Negizi jurtshylyqtyń kózqarasyn bilý úshin halyq arasynda saýalnama jıi júrgizilip turady. Bul kerek nárse. Al osydan birneshe apta buryn Astana qalasynyń ataýy ózgergeninen jurtshylyq habardar. Al buǵan qazaqstandyqtardyń kózqarasy qandaı? Saýalnama nátıjesi kórsetkendeı, qazaqstandyqtardyń basym kópshiligi astana ataýynyń ózgergenin jaǵymdy túrde baǵalaıdy. Suralǵandardyń 42 paıyzy bul Elbasynyń atyn este qaldyrý maqsatynda jasalǵan durys qadam dep otyr.

Aıta keter bir jaıt, jurtshylyqtyń kózqarasyn bilý úshin (http://demos.kz/rus/index.php?poll=76) júrgizilgen saýalnamaǵa Astana, Almaty, Shymkent qalalary men elimizdiń 14 oblys ortalyǵynan 1813 adam qatysqan. Saýalnama 29 jáne 30 naýryz aralyǵynda júrgizilgen.

Zertteý nátıjesine sensek, qazaqstandyqtardyń basym kópshiligi, ıaǵnı 87 paıyzy Elbasynyń jumysyn jaǵymdy túrde baǵalap otyr. Saýalǵa jaýap bergen respondentterdiń 44 paıyzy onyń óz erkimen prezıdenttik laýazymnan ketýin  ýaqytynda jáne abyroıly jasalǵan qadam dep sanaıdy.

Jalpy alǵanda, Nazarbaevtyń bılikti berý prosesin qazaqstandyqtar oń baǵalaıdy: respondentterdiń 44 paıyzy Nazarbaevtyń bılikten ketý týraly sheshimin maquldaıdy, 23 paıyzy abyrjyǵan kúı tanytqan, 16 paıyzy bılik tranzıtine beıtaraptyǵyn bildirgen jáne olar Elbasynyń memleket basshysy retinde qala beretinin qoldaǵan. Saýalǵa jaýap bergenderdiń 12 paıyzy sońǵy kúnge deıin ol bılikte qalýy kerek dep sanaıdy.

Jalpy saýalnama barysynda Nazarbaevtyń prezıdent retindegi jumysyn ásirese aǵa urpaq ókilderi joǵary baǵalaǵan: 60 jastan asqan azamattardyń 90 paıyzy onyń qyzmetin jaǵymdy dep esepteıdi. Al 30-39 aralyǵyndaǵy jastardyń 82 paıyzy Elbasynyń qyzmetine oń baǵa bergen.

Saýalnamaǵa qatysqan azamattardyń 50 paıyzy  Qazaqstanda beıbitshilik ornatýda Nazarbaevtyń eńbegi eren boldy degen pikirde.  Olar elimizdegi etnıkaralyq tatýlyqty nyǵaıtý men  Qazaqstanda turaqtylyqty saqtaýda Tuńǵysh prezıdenttiń úlesi orasan zor ekenin aıtady.

Al jaqynda ǵana Prezıdenttik laýazymyna kirisken Qasym-Jomart Toqaev týraly jurtshylyqtyń pikiri qandaı? Saýalnama barysy kórsetkendeı,  suralǵandardyń 40 paıyzy prezıdenttikke úmitkerlerdiń ishinde memleket basshysyna eń laıyqty kandıdat Qasym-Jomart Toqaev dep sanaıdy.

Al prezıdenttik laýazymǵa kirisken Qasym-Jomart Toqaevtyń aldynda qandaı mindetter tur? Saýalnamaǵa jaýap bergenderdiń 43 paıyzy birinshi ýaqytta Nazarbaev alǵa qoıǵan maqsattardy, atap aıtqanda áleýmettik memlekettik baǵdarlamalardy oryndaý kerektigin alǵa tartady. Respondentterdiń 20 paıyzy áleýmettik baǵdarlamalardy áli de bolsa jalǵastyrý kerek dep sanaıdy. Saýalnamaǵa qatysqandardyń 24 paıyzy jemqorlyqpen kúres ekinshi másele bolýy kerek dep esepteıdi. Al 12 paıyzy shaǵyn jáne orta kásipkerlikti damytý máselesimen aınalysqan jón degen pikirde.