Baıqońyr qalasyn jalǵa berýden kezeń-kezeńmen shyǵý máselesi qazaqstandyq taraptyń kún tártibinde tur, dep habarlaıdy Qamshy.kz aqparat agenttigi Sputnik Qazaqstan saıtynyń deregine súıenip.

Qazaqstan men Reseı Baıqońyr qalasyn Qazaqstannyń quzyretine berý máselesin talqylap jatyr. Bul týraly búgin sıfrlyq damý, qorǵanys jáne aeroǵarysh ónerkásibi mınıstriniń mindetin atqarýshy Marat Nurǵojın málimdedi.

Senatorlar raketa ushyrylatyn alańdardy ǵana Reseı úkimetine jalǵa berýdi qaldyryp, Baıqońyr qalasyn Qazaqstannyń quzyretine berý kerek ekenin aıtty. Osyǵan qatysty sıfrlyq damý, qorǵanys jáne aeroǵarysh ónerkásibi mınıstrliginiń pikiri qandaı ekenin surady.

"Bul másele úkimetaralyq komısıanyń turaqty baqylaýynda. Qalany jalǵa berýden kezeń-kezeńmen shyǵý máselesi qazaqstandyq taraptyń kún tártibinde tur. Qazir memlekettik organdar arasynda muqıat talqylap jatyrmyz", - dedi Nurǵojın senattyń jalpy otyrysynda.

Ol Roskosmos basshylyǵymen bul másele aýyzsha tártipte talqylanǵanyn atap ótti.

"Ońaı sheshile salatyn dúnıe emes, jan-jaqty talqyǵa salyp, artyq-kem tustaryn qarastyrýymyz kerek", - dedi Nurǵojın.

Aıta ketsek, búgin senat májilis maquldaǵan "1995 jylǵy 23 jeltoqsandaǵy Qazaqstan men Reseı arasyndaǵy Baıqońyr qalasynyń mártebesi jáne ondaǵy atqarýshy ókimet organdaryn qurýdyń tártibi men olardyń mártebesi týraly kelisimge ózgeris engizý týraly hattamany ratıfıkasıalaý týraly zańdy qabyldady.

Usynǵan: Nazerke Labıhan