Aqtóbe qalasynyń turǵyny taýyp alǵan jeke kýálik arqyly bankten nesıe rásimdegen. Qujatty tapqan er adam nesıege tehnıkalardy jedel satyp, túsken aqshany býkmekerlik ortalyqta oıynǵa salyp, utylyp qalǵan. Ótirigi ashylǵan kezde ol Reseıde boı tasalap júripti-mys.

Aqtóbe qalasyndaǵy ortalyq dańǵylda ornalasqan sport kesheniniń mańynan ózge adamnyń tólqujatyn taýyp alǵan Arsen I. esimdi azamat  turmystyq tehnıkalar satatyn dúkenge baryp, eki kompúterlik oıyn, djoıstık, smart-saǵat, fıtnes-braslet, uıaly telefon, oıyn konsýlyn nesıege rásimdegen.

Birinshi joly batpan quıryqqa kez bolǵan Arsenge tek 985 myń teńge kóleminde nesıe taǵaıyndalypty. Al araǵa apta salyp, basqa dúkenge barǵan ol taǵy da tabylǵan tólqujat arqyly 335 myń teńge turatyn uıaly telefon jáne noýtbýk alady.

Nesıege alynǵan zattardy jarnamalyq saıttarda satyp, odan túsken aqshany býkmekerlik ortalyqta utylǵan Arsen Reseıge baryp boı tasalaıdy. Araǵa kóp ýaqyt salmaı, kúdikti Arsen sot aldynda jaýap berdi.

Onyń aıtýynsha, ol tabylǵan tólqujattaǵy azamatpen qatty uqsas bolypty. Býkmekerlik kontorda utylyp qalǵan ol Reseıde jumys istep, sodan tapqan tabysymen qaryzyn jappaq bolǵanyn aıtady.

Sot sheshimi boıynsha Arsen I. «alaıaqtyǵy» úshin aıyptalyp, eki jylǵa bas bostandyǵynan aıyryldy. Sondaı-aq, sot qylmysker azamatty eki bankke 2 mıllıon teńge kólemindegi ótemaqy tóleýge mindettedi.