Atyraýda jastar isi jónindegi keńestiń kezekti otyrysy ótti dep habarlaıdy Óńirlik komýnıkasıalar qyzmeti.

Jınalysqa memlekettik organdardyń basshylary, oblystyq ardagerler keńesiniń, qoǵamdyq jáne kásipodaq uıymdarynyń, jastar birlestikteriniń músheleri men stýdentter qatysty. 

-Elimizde jastar arasyndaǵy jumyssyzdyq deńgeıi 3,8%,  al bizdiń óńirde- 2,4%. Búginde oblystaǵy stýdentter «Máńgilik el», «Jastar ındýstrıaǵa», «Serpin-2050» baǵdarlamalary boıynsha bilim alyp jatyr. Júzden astam mekemeniń basshylarymen kezdesip, jumyspen qamtý baǵdarlamalary boıynsha túsinik jumystaryn júrgizdik. Basqarmaǵa da mekemelerden suranystar túsedi. Bıyl jastar tájirıbesimen mekemelerge 1000 jas barady. Ótken jyly 1186 adam oqytýdan ótip, 511-i jumysqa ornalasty,-dedi oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Serik Qamıdolla.

Oblys ákimi kún tártibindegi taqyryp boıynsha tapsyrmalar berdi.
-Jastar tájirıbesi- tıimdiligin kórsetken joba. Ótken jyly oǵan myńnan astam jas qatysyp, jartysy jumysqa ornalasty, bul jaqsy kórsetkish. Oblysta 12 myńnan astam mekeme bar, stýdentter solarda bilim ala otyryp, óndiriske aralasýǵa, ózderin jetildirýge múmkindik alady. Joq degende 2-3 myń kásipker ýnıversıtet bitirgen jastarǵa tájirıbeden ótýdi usynady, olarǵa eńbek aqy jergilikti búdjet esebinen tólenedi. Eger jas qyzmetker ózin jaqsy qyrynan kórsetse, jumysqa qaldyrady. Endi nege kvota sanyn kóbeıtpeske? JOO bitirgen jastardyń mamandyqtary boıynsha jumysqa ornalasqandary jaqsy,-dedi aımaq basshysy Nurlan Noǵaev.

Sonymen qatar, Atyraý oblysynyń ákimi quzyrly organdarǵa jumyssyzdyqtyń aldyn alý úshin ár jas tájirıbeden ótýshini jeke baqylaýǵa alýdy tapsyrdy.
 
-Kezinde Elbasy ár mektep túlegin baqylaýda ustaýdy tapsyrǵan bolatyn. Kim qandaı mektepti bitirdi, qandaı oqý ornyna tústi, qandaı qyzmetke ornalasty? Eger jumyssyz bolsa,  nemen aınalysýda? Bul aýdan basshylarynyń, aýyl ákimderiniń, oqý oryndarynyń jumysy. Jastar arasyndaǵy jumyssyzdyqty azaıtýǵa baǵyttalǵan sharalar,-dedi Nurlan Noǵaev.