Atyraý oblysynyń ákimi sport nysanyndaǵy jumystardyń barysyn ınspeksıalap, merdiger uıymnyń ókildermen sóılesti.
Qazirgi kezde tabıǵı jabyndy jasandy jabynmen almastyrý jumystary aıaqtalyp keledi. «Munaıshy» stadıonynda sońǵy úlgidegi gazon tóseý aǵymdaǵy jyldyń naýryz aıynda bastalyp, qazir jumystar 80% kólemde atqaryldy.
Jobanyń bas sponsory - «GAZ stroy montazh KZ» JSHS, qajetti tehnıkany «Atyraýınjstroı» JSHS berdi.
Atyraý oblysy sport jáne dene shynyqtyrý basqarmasynyń aqparaty boıynsha, jerdi tegisteý kezinde qandaı da bolmasyn syzattar men qıǵashtyqtardy boldyrmaý maqsatynda, jobanyń alǵashqy kezeńinde geologıalyq jáne geodezıalyq jumystar júrgizildi.
- Fýtbol alańynyń astyndaǵy drenajdyq tabandy jasaý úshin qalyńdyǵy 30 sm nyǵyzdalǵan balas, qalyńdyǵy 20 santımetrlik 5-20 fraksıasyndaǵy nyǵyzdalǵan qıyrshyq tas tógiledi jáne nyǵyzdalǵan jaǵdaıda 10 santımetrlik elem jasalady. Sodan soń, alańǵa Taishan kompanıasynyń jasandy gazony tóseledi, oǵan 18 kg kvars qumy jáne 10 kg SBR rezenke túıirshigi tógiledi,-dep baıandady «GAZ stroy montazh KZ» JSHS-niń bas dırektory Muhtar Baqyt.
-Alańnyń aýmaǵy 5 metrge ulǵaıtyldy, sóıtip, ol endi ÝEFA-nyń standarttaryna tolyqtaı sáıkes keledi. Jabyndy aýystyrý jumystary barysynda nysanǵa 6 myń tekshe metrge jýyq ınertti materıaldar ákelindi, tóseý jumystaryna 22 jumysshy tartyldy.
Sport jáne dene shynyqtyrý basqarmasynyń basshysy Rınat Ibragımovtyń aıtýynsha, birneshe jyl jatqan burynǵy tabıǵı gazon beti tegis emes jáne basqa da olqylyqtaryna baılanysty fýtbolshylarǵa qolaısyz bolǵan edi. Endi, ınovasıalyq jabynnyń arqasynda atyraýlyq sportshylardyń oıyn sapasy aıtarlyqtaı jaqsarýy tıis. Sporttyq nysanda bolǵan Atyraý oblysynyń ákimi Nurlan Noǵaev osyndaı senim bildirdi.
- Stadıonnyń jabynyn aýystyrý jumystary ýaqtyly jáne sapaly aıaqtalýy tıis. Fýtbolshylardyń jattyǵýy jáne halyqaralyq deńgeıdegi oıyndardy ótkizýi úshin laıyqty oryn bolýy kerek. Bizdiń sportshylarymyzdyń oıyn sapasy alańnyń sapasyna tikeleı táýeldi, komandanyń týrnırlik kestede jyljýy da osyǵan baılanysty ,– dedi oblys ákimi merdigerlerge.
Atap óteıik, «Munaıshy» stadıony 1950 jyly ashylǵan, syıymdylyǵy – 8 690 adam. Gazony jańartylǵannan keıin stadıonnyń aýmaǵy 110 da 70 metrdi qurap, ÝEFA-nyń standarttaryna sáıkes bolady.