Mańǵystaý oblysyna arnaıy saparmen Qazaqstan respýblıkasynyń prezıdenti Qasym-Jomart Toqaev keldi. Memleket basshysy aldymen Aqtaý qalasyndaǵy kásipkerlerge qyzmet kórsetý ortalyǵyna bardy. Jumys sapary barysynda Prezıdent kásipkerlerge «bir tereze» qaǵıdasy boıynsha qyzmet kórsetetin ortalyqtyń jumysymen tanysty. Ortalyq memlekettik satyp alý, býhgalterlik, salyq jáne statısıkalyq esepter, kedendik rásimder, aqparattyq tehnologıalar boıynsha qyzmet kórsetedi. Sondaı-aq, bızneske memlekettik qoldaý kórsetý jáne kásipkerlerge quqyqtyq kómek berý máseleleri jóninde tegin keńes beriledi. Sonymen qatar, Prezıdentke «Bastaý-Bıznes» baǵdarlamasynyń júzege asyrylý barysy baıandaldy. «Atameken» Ulttyq kásipkerler palatasynyń jobalary: túıe sharýashylyǵy, repetıtorlik ortalyq, tıpografıa, sulýlyq salony, stomatologıalyq kabınet, balabaqsha jáne basqa da bastamalar tanystyryldy.
Aqtaýdaǵy teńiz akademıasy da Qasym-Jomart Toqaevtyń nazarynan tys qalmady. Memleket basshysy keme júrgizýshilerdiń, keme mehanıkteriniń, shtýrmandardyń kóp fýnksıalyq trenajerlik synyptary, sondaı-aq, alǵashqy medısınalyq kómek kórsetýge, órtke qarsy jáne qutqarý jumystaryn uıymdastyrýǵa arnalǵan dárisqanalary bar akademıanyń kópbeıindi materıaldyq-tehnıkalyq bazasyn aralap kórdi. Stýdenttermen beıresmı áńgimelesý barysynda Qasym-Jomart Toqaev zamanaýı standartqa saı sapaly ári arnaıy bilim alýdyń mańyzdylyǵyn atap ótip, olardyń oqýda tabysty bolýyna tilektestik bildirdi. Ýnıversıtet stýdentteri óskeleń urpaq máselelerine erekshe kóńil bólip, Jastar jyly aıasynda memleket tarapynan qoldaý kórsetilip jatqany úshin Qazaqstan Prezıdentine alǵys aıtty.
Qazaqstan Prezıdenti Qasym-Jomart Toqaev «Aqtaý halyqaralyq teńiz saýda porty ulttyq kompanıasy» aksıonerlik qoǵamyna da bardy. Sapar barysynda Memleket basshysyna Aqtaý teńiz portynyń qazirgi jumystary, Kaspıı teńizi arqyly ótetin júk tasymalyn arttyrýdyń perspektıvalary, sondaı-aq Aqtaý qalasyndaǵy shıpajaı aımaǵynyń ınfraqurylymyn damytý jóninde málimet berildi. Qasym-Jomart Toqaev óndiristik mindetterdi tolyqqandy oryndaýǵa, sonyń ishinde júk tasymaly operasıalaryn júrgizýge, kemelerdi aılaqqa qoıýǵa jáne qyzmet kórsetýge septigin tıgizetin porttyń tehnıkalyq múmkindikterimen tanysty. Premer-Mınıstrdiń orynbasary Jeńis Qasymbek Aqtaý halyqaralyq teńiz saýda portynyń jahandyq kólik dáliziniń qıylysynda ornalasýy, jylyna 17,7 mıllıon tonna qurǵaq júkterdi, shıki munaı men munaı ónimderin tasymaldaýǵa múmkindik beretinin baıandady.
Qazaqstan Prezıdenti Qasym-Jomart Toqaev Mańǵystaý oblysynyń jurtshylyǵymen de kezdesti. Basqosýǵa oblystyq máslıhat depýtattary, ardagerler keńesiniń músheleri, úkimettik emes sektorlar men bıznes qoǵamdastyǵynyń, sondaı-aq ǵylymı-pedagogıkalyq zıaly qaýym ókilderi jáne oblys jastary qatysty. Qasym-Jomart Toqaev óńirge jasaǵan saparynyń mańyzdylyǵyn aıtyp, tarıhtyń asa jaýapty sátterinde mańǵystaýlyqtardyń el basshylyǵyna árdaıym qoldaý kórsetkenin erekshe atap ótti. Memleket basshysy Qazaqstannyń Tuńǵysh Prezıdenti – Elbasy N.Á.Nazarbaevtyń basshylyǵymen elimizdiń táýelsizdik jyldaryndaǵy qol jetkizgen jetistikterine arnaıy toqtaldy.
– Barshańyz bilesizder, Elbasy tarıhı sheshim qabyldap, Qazaqstan órkendeýdiń jańa satysyna qadam basty. Biz Tuńǵysh Prezıdent aıqyndap bergen strategıalyq maqsat-mindetterdi júzege asyrýdy odan ári jalǵastyra beremiz. Osy jyldar ishinde egemen elimizdiń saıası basqarý júıesinde sabaqtastyq dástúrdi qalyptastyrdyq. Elimizdi odan ári ilgeriletip, damytý – bizdiń aldymyzda turǵan mańyzdy mindet, – dedi Memleket basshysy.
Qazaqstan Prezıdenti ekonomıka ósimin qamtamasyz etýdiń, jańa jumys oryndaryn ashýdyń, halyqtyń tabysyn arttyryp, turmys sapasyn jaqsartýdyń mańyzdylyǵyn aıtty.
– Tek munaı salasyna ǵana senip, ómir súrýge bolmaıdy. Qazirgi zamanda bul tıimsiz. Investısıa – ekonomıkalyq ósim men óńirdiń ál-aýqatyn arttyrýdyń negizi. Erkin ekonomıkalyq aımaǵymyz, sonyń ishinde «Aqtaý teńiz porty» erkin ekonomıkalyq aımaǵy ınvestısıa tartý áleýetine ıe. Sondaı-aq, týrızmdi damytý isi elimizdiń perspektıvasy zor ekenin kórsetedi. Bul salada Mańǵystaý oblysynyń birqatar naqty basymdyqtary bar, – dedi Qasym-Jomart Toqaev.
Kezdesý barysynda Qazaqstan Prezıdenti Úkimetke, mınıstrlikterge, ákimdikterge, damý ınstıtýttaryna ulttyq ekonomıka ósimin qamtamasyz etýge, turǵyndardyń turmys sapasyn arttyrýǵa, sybaılas jemqorlyqqa qarsy kúresti kúsheıtýge, kadrlar irikteý júıesin jetildirýge, sondaı-aq qoǵammen tıimdi qatynas ornatýǵa baǵyttalǵan birqatar naqty sharalar qabyldaýdy tapsyrdy.
Sońynda Qasym-Jomart Toqaev Qazaqstan Respýblıkasy Prezıdentiniń kezekten tys saılaýyn ótkizý jónindegi sheshimin qoldaǵany úshin kezdesýge qatysýshylarǵa alǵys bildirip, barshasyna tabys jáne amandyq tiledi.
