Aqtaý teńiz portynda Transkaspıı halyqaralyq kólik baǵyty boıynsha fıderlik jelini ashý boıynsha saltanatty is-shara ótti. Baký portyna konteınerlerimen qosa qazaqstandyq tuńǵysh «Túrkistan» fıderlik kemesi jiberildi. Osy jobanyń teńiz operatory «Qazaqteńizkólikfloty» UTQK bolyp tabylady.
İske qosý rásimine «Samuryq-Qazyna» Ulttyq ál-aýqat qory» AQ Basqarma tóraǵasy Ahmetjan Esimov, Mańǵystaý oblysynyń ákimi Eraly Toǵjanov, «QazMunaıGaz» UK» AQ Basqarma tóraǵasy Alık Aıdarbaev, «Qazaqstan temir joly» UK» AQ Basqarma tóraǵasy Saýat Myńbaev jáne Transkaspıı baǵytyndaǵy servısti paıdalanatyn kólik-logıstıkalyq kompanıalardyń basshylary men júk jóneltýshiler qatysty.
Fıderlik kemeler apta saıyn qatynap turatyn bolady. Transkaspıı baǵyty (TMTM) óńirdegi eýrazıalyq kólik arterıalarynyń negizgi býyny bolyp tabylady jáne Qazaqstannyń tranzıttik dálizderi júıesin tolyqtyrady. Bul Qytaı men Qazaqstannan Kavkaz, Túrkıa elderine tikeleı shyǵý.
Turaqty fıderlik qatynas Transkaspıı halyqaralyq kólik baǵyty boıynsha júk aǵynyn arttyrýǵa jáne Kaspıı óńirinde júkterdi konteınerleýdiń odan ári damýyna yqpal etedi.
Jıynda Mańǵystaý oblysynyń ákimi Eraly Toǵjanov sóz alyp, fıderlik jeliniń mańyzyn túsindirdi.
-"Búgin biz oblysymyzdyń ekonomıkasy men kólik ınfraqurylymyn damytýǵa jol ashatyn taǵy bir mańyzdy tarıhı sáttiń kýási bolyp otyrmyz. Jalpy Qazaqstannyń, sonyń ishinde Mańǵystaýdyń ınfraqurylymyn damytýdyń negizin qalaýshy – bizdiń Tuńǵysh Prezıdent - Elbasy Nursultan Ábishuly Nazarbaevtyń bastamasy boıynsha 2,5 myń km jańa temir jol jáne 12,5 myń km avto jol salyndy, bul Qytaıdan Parsy shyǵanaǵy men Eýropa elderine bizdiń porttar arqyly júkterdi tasymaldaý saldarynan respýblıkanyń tranzıttik áleýetin tıimdi paıdalanýǵa múmkindik berip otyrǵany sózsiz. Osynyń arqasynda, biz táýelsizdik jyldary logıstıka salasyndaǵy halyqaralyq qaýymdastyqtardyń tolyqqandy múshesi boldyq. Transkaspıı baǵyty - bul Qazaqstannyń tranzıttik dálizderiniń júıesin tolyqtyratyn aımaqtaǵy eýrazıalyq kólik arterıalarynyń mańyzdy býyny", dedi.
«QazMunaıGaz» UK Basqarmasynyń tóraǵasy Alık Aıdarbaev atap ótkendeı, bul baǵyt «Nurly jol» baǵdarlamasyna sáıkes ashylyp otyr. Negizgi mindeti Qazaqstannyń kólik-logıstıkalyq áleýetin damytý jáne eldiń ekonomıkalyq ósýin qamtamasyz etý úshin tıimdi ınfraqurylym qurý bolyp tabylady. «QazMunaıGaz» kompanıalar toby halyqaralyq mýltımodaldy teńiz tasymaldaryn jetildirý arqyly osy proseske belsendi túrde tartylǵan.
«Qazaqteńizkólikfloty» UTQK fıderlik qatynas operatory bolyp tabylady, onyń birinshi synypty memlekettik lısenzıasy bar, qazirgi zamanǵy saýda floty bar jáne tájirıbeli jáne bilikti personalmen qajetti quzyrettilikke ıe.
Fıder baǵyty úshin «Nurly jol» baǵdarlamasyna sáıkes satyp alynǵan jańa flot paıdalanylatyn bolady.
Osy tasymaldardy oryndaý Teńizde júzý qaýipsizdigi jónindegi halyqaralyq jáne ulttyq talaptarǵa qatań sáıkestikte júzege asyrylatyn bolady.
