Aqtaý qalasyndaǵy Nazarbaev Zıatkerlik mektebinde «Caspian Startup-2019» oqýshylar men kolej stýdentteri arasyndaǵy startaptar konkýrsynyń 5 jeńimpazyna 350 myń teńgeden tabystaldy. Jastardy kásipkerlikke baýlyp, tyń ıdeıalardy izdegen saıysta «İT», «Ǵylym jáne tehnologıa», «Áleýmettik jobalar», «Týrızm», «Agrobıznes» baǵyttary boıynsha irikteý kezeńinen ótken 25-joba óz jobalaryn qorǵaǵan edi.

Kásipkerlerden quralǵan qazylar alqasynyń aldynda qatysýshylar óz jobalaryn 7 mınýt ishinde tanystyryp shyqty. Konkýrstyq komısıa sheshimimen «IT» baǵytyndaǵy úzdik joba dep Rodıon Ignatov pen Aıjuldyz Nadırhanovanyń «UARStuding» startapy tanylsa, «Ǵylym men tehnologıa» baǵytynda Nurbergen Naýryzbaevtyń «Plasık qaldyqtaryn óńdeý arqyly munaı men janarmaı kózin alý» bıznes-jobasy 350 myń teńgege ıe boldy. «Áleýmettik jobalar» baǵytynyń úzdigi Súıerqul Nurmuhammed, Mýhamedzánov Madıar, Jumaǵalın Bekzattyń «Z Generation – The New Way To The Future» boldy. «Týrızm» baǵytyndaǵy úzdik joba Dana Esbergenovanyń «Gorodskoe vodno-bolotnoe ýgode kak model ekosıstemy, ýstoıchıvoı k antropogennomý vozdeıstvıý (na prımere ozera Karakol)» ıdeıasy, «Agrobızneste» shash pen tyrnaqtan tyńaıtqysh jasaýdy usynǵan Baıdaýlet Azamat jeńdi.

• «Caspian Startup-2019» saıysynyń ótkizilý formaty men ıdeıasy qatty unady. Men jobamdy kásipkerler aldynda tanystyryp, bastamama sendirýdiń qupıalarymen, bıznes-jospar jasaýdy úırendim. Jeńisten alǵan qarajatymdy depozıtke salyp, bolashaqta joǵary oqý ornyna túskende qajetime jaratýdy josparlap otyrmyn, - deıdi «Agrobıznes» nomınasıasynyń jeńimpazy Azamat Baıdaýlet.

         Startap jobalar baıqaýynyń jeńimpazdaryna qarjylaı syılyqty «MKS Logistics» JSHS, «Mediana» İT-kompanıasy, «EXPO&WOMEN», «Evrovoıaj» týr agenttigi, «TETIS» JSHS beredi.

         Aıta keteıik, ekinshi ret uıymdastyrylǵan bıznes-ıdeıalar saıysyna  195 jobadan ótinish kelip tústi, onyń 172-i jarysqa qatysty. Qatysýshylar «Áleýmettik jobalar» nomınasıasynda belsendilik kórsetti. 54 jobanyń ishinen bes joba ǵana iriktelip alyndy. Al «Agrobıznes» nomınasıasyna 42, «Týrızmge» - 35, «Ǵylym jáne tehnologıaǵa» 42 ótinish keldi. Al «İT» nomınasıasyna 20 joba qatysty.

Sonymen qatar, jarys qatysýshylarynyń kásipkerlikke yntasyn arttyrý maqsatynda «Atameken» kásipkerler palatasynyń kásibı bıznes treneri Raıhan Bekbergen men Yessenov ýnıversıteti janyndaǵy Kaspıı kásipkerlik ortalyǵynyń jetekshisi Gúlzıra Qosmaǵanbetova arnaıy sheberlik saǵatyn ótkizdi.