9 maýsymda ótetin  Prezıdent saılaýyna qatysty túrli boljamdar aıtylyp, saıası saraptamalar júrgizilip, aldaǵy saılaý jaıly basylymdar jarysa jazyp jatyr. Osy rette saılaýǵa túsýshi úmitkerlerdiń qarym-qabileti men jeńiske jetý múmkindikterin bilý úshin Qamshy.kz aqparat agenttigi sandardy sóıletip kórgen edi. Kandıdattardyń minez-qulqy men saılaýda jeńiske jetý múmkindikteri nýmerologıa turǵysynan qandaı bolmaq? Bul suraqqa belgili nýmerolog Quralaı Baqytqyzy jaýap bergen bolatyn.

Eń aldymen Qasym-Jomart Toqaevtyń sandaryn esepteı kele nýmerolog mynadaı boljam jasady:

«Qasym-Jomart Kemelulynyń basty kody – 314. Sonymen qatar, myńdyq kody da bar. Iaǵnı, kody 314 bolǵandyqtan, bul adamnyń mısıasy - ádilet ákelý. Kóp nárseni tarazylap júrgendi jaqsy kóredi. Qandaı da bir jaǵdaı bolyp, másele týyndasa qoldaý bildire alady. Bul kisiniń sandaryna úńilsek, zań salasynda jaqsy qyzmet ister edi. Biraq, basshy bolsa ádiletti basshy bolady. Til meńgerýge qabileti óte joǵary. Sonymen qatar, 1 sany óte kóp. Ózine senimdi kúsh-jigeri myqty adam. Ózgelerge sózi júredi, bitimger. Kóp nárseni josparlaıdy, aıaq asty sheshim qabyldaýy qıyn. Myqty sarapshyǵa jatady. Sandarynda eki 5-i bar patrıot, meıirimdi. Eki 3-i bar, esepke júırik.  Qoryta kele, bul kisi jaqsy zańger, qarjyger, sarapshy, dıplomat, óte mádenıetti, polıglot, shydamdy adamǵa jatady. Myńdyq kod ómiriniń ekinshi jartysynda turǵandyqtan, bul adamǵa orta jol joq. Maǵan sandardy esepteı kele unap otyrǵany óte ádiletti jáne qabileti joǵary. 66 jasynda úlken armany oryndalady, jańa laýazym, jańa jumys kútip tur», - deıdi.

Sonymen qatar Quralaı Baqytqyzy, "búgingi prezıdenttikke usynylyp otyrǵan kandıdattardyń barlyǵynda 5 sany óte kóp" deıdi.  5 sany kóp adamdar patrıot, eline-jerine adal qyzmet etetin jandar eken.

Al Ámirjan Qosanov týraly: «Bul kiside jańashyldyqtyń kody bar. Óte bilimdi adam. Strateg, asyqpaı sheshim qabyldaıdy, barlyǵyn josparmen jasaıdy, qoly ashyq. Matematıkadan mektepte jaqsy oqyǵan bolar dep oılaımyn. Sandarynda úsh 9 bar. Mıy kúndiz-túni demalmaı istep turatyn adamdardyń qatarynan. Basyna kóptegen ıdeıalar keledi, oıshyl adam. Sáttilikke jaýap beretin sany da joq emes. Boıynda shynshyldyq izdeýi, namysshyldyǵy basym. Bul kisige de bıylǵy jyl sátti jáne nýmerologıa boıynsha Tóleýtaı Sataıuly ekeýiniń múmkindigi birdeı», -dedi.

Sádibek Túgeldiń sandarynda psıhologtyń kody bar. Artynan iz qaldyratyn adamdardyń qatarynda. Oıy ushqyr, bilimdi adamǵa jatady. Adamdardy jaqsy túsinedi. 1 sany az, ıaǵnı buıyryp sóılegennen aqyldasyp sóılegendi jaqsy kóredi. Erte eseıgen adamǵa jatady. 5 sanynan 3-eý bar. Bul adam óte patrıot adam. Ózgelerge meıirimdi, jany ashyp turady. Energıasy te kóp. Jańashyldyqqa jaqyn adam. Óıtkeni kodynda jańashyldyq basym. Eger dárigerlik pen psıhologıa salasyn tańdaǵanda jaqsy bolar edi. Intýısıasy jaqsy, óte shynshyl adam. Biraq bıylǵy jylmen qarastyrsaq, múmkindigi óte az.

Amangeldi Taspıhovta da myńdyq kody bar, biraq ómiriniń birinshi jartysynda tur. Jáne sandary basshylyqqa jaqyn. Sheneýnikterde, Úkimet basynda júretin adamdarda osyndaı sandar bolady. Jetekshilik etýge, bireýdi baǵyttaýǵa jaqyn. Orta jol joq, óte qabiletti adam. Namysshyl, ambısıasy basym. Eńbekqor adamdardyń qatarynan. Kóbine ózgeniń qamyn oılap ketetini bar. Kóp adamdarǵa jaqpaı jatady. Qasym-Jomart Toqaev, Sádibek Túgelde 7 sany bar bolyp tur. Amangeldi Taspıhovta 7 sany joq. Iaǵnı adamdarǵa kómektesedi, biraq adamdar baǵalamaıdy. Qabileti boıynsha geografıa, tarıh pánderinen jaqsy oqyǵan bolýy kerek. Minezinde prokýror, mılısıoner, tergeýshiniń qabileti kórinedi.  Óz aıtqanynan qaıtpaıdy. Bıyl múmkindigi óte joǵary emes. Biraq basshylyqqa jaqyn sandary bar.

Al nýmerologıa boıynsha Danıa Espaevanyń ómirdegi mısıasy – qoǵamǵa qyzmet etý. Kóbine Úkimet jumystaryn jaqsy atqara alady. 156 degen kody bar. Óte eńbekqor adamǵa jatady. Burynǵy Prezıdentimiz Nursultan Nazarbaev sıaqty onyń da 6 sany óte kóp. Áıel adam bolǵandyqtan kandıdattardyń ishinde eńbekqorlyǵymen erekshelenedi. Bul kisi aqshany berekeli ustaıdy. Minezi jaqsy adamǵa jatady. Aqkóńil, kez kelgen adammen til tabysa biledi. Kóp nárseni júregine jaqyn qabyldaıdy, sezimtal. 58 jasynda jańa jumys kútip tur. Biraq prezıdenttik deı almaımyn. Jalpy joly bolǵysh adamdardyń qatarynan.

Tóleýtaı Sataıuly Rahymbekovtyń da myńdyq kody bar. Mysaly, nýmerologıa boıynsha Danıa Espaeva qarapaıym adamdarǵa jatady. Al Tóleýtaı Sataıuly biraz erekshelenedi. Ózin óte joǵary ustaıdy. Óte joly bolǵysh, kóp nárse sáttiliktiń arqasynda kelgen. Óte joly bolǵysh adamdardyń qatarynda. Búkil úmitkerlerdiń ishinde 2,7,8 sany bar. El aldynda ózin ustaı alady. Sóıleı alady. Bireýge sózi ótedi. Biraq 6 sany joq. Iaǵnı jumys istese, qolaıly grafık izdeıdi. 54 jasy óte jaqsy jyl, múmkindigi óte joǵary. 54 jasynda ózin kórsete alatyn jyl.

Jambyl Ahmetbektiń sandarynda 1 sany óte kóp. 1 sany kóbinde dıktatorlarda bolady. Sózi ózgelerge júredi, buıyryp sóıleı biledi. Sózi naqty, oıy ashyq. Ómiriniń ekinshi jartysy jeńil dep tur. Mansap jolynda úlken jetistikke jetýge múmkindigi joǵary. Sátti sany joq. Sondyqtan bul adamǵa kóp nárse eńbek pen minezdiń arqasynda kelgen. Minezi, kúsh-jigeri myqty. Aldyna aıqyn maqsat qoıa alady. Soǵan jetý jolynda kez kelgen qıyndyqqa tótep beretin adam. Tazalyqty óte jaqsy kóredi. Ómirdegi mısıasy – ákim bolý, ádemilik ákelý, jetekshilik etý. Bul adamda da basshylyqqa jaqyn sandar bar. 58 jas óte jaqsy jyl. Jańa ómir bastalady, ózin jańa qyrynan kórsetedi. Bul kisiniń Qasym-Jomart Toqaevtan keıingi múmkindigi joǵary.

Osylaı árbir kandıdattyń sandarmen saıası portretin jasaǵan nýmerolog Quralaı Baqytqyzy kimniń qaı orynda bolatyny jaıly boljam jasady. Onyń aıtýynsha, birinshi orynda – Qasym-Jomart Toqaev, ekinshi orynda – Jambyl Ahmetbek, úshinshi orynda – Ámirjan Qosanov pen Tóleýtaı Raqymbekov bolýy múmkin. Qalǵan kandıdattardyń jeńiske jetý múmkindigi nýmerologıa boıynsha tómen bolyp tur, - deıdi nýmerolog.

Bul jaı ǵana nýmerologıalyq boljam ǵana. Kimniń jeńiske jeterin aldaǵy saılaý anyqtaıtyn bolady.

Marjan Sábet