Nurlan Noǵaev aımaqtaǵy qoǵamdyq tasymalmen aınalysatyn avtoparkterdiń ıelerimen kezdesip, ózekti máselelerdi talqylady.
Búginde Atyraý oblysynda jolaýshylar tasymalymen 15 jeke kompanıa aınalysady, onyń 9-y oblys ortalyǵynda qyzmet kórsetedi, 30 baǵytqa 190 avtobýs tartylǵan.
-Ótken jyly lızıńtik nesıe baǵdarlamasy boıynsha 91 avtobýs alyndy, biraq Atyraýdaǵy qoǵamdyq kólik jetispeýshiligi problemasyn sheshý úshin taǵy 150 avtobýs kerek. Osy baǵyttaǵy jumystar júrip jatyr, aldaǵy jyldary másele sheshiledi,-dedi jolaýshylar kóligi jáne avtokólik joldary basqarmasynyń basshysy Áset Orazǵalıev.
Atyraý oblysynyń ákimi Nurlan Noǵaev óńirde qoǵamdyq kólikti damytý tujyrymdamasy tabysty júzege asyp jatqanyn atap ótti. Avtopark jańartylyp, elektrondy bılet júıesi engizilgen. Bıyl qaladaǵy 11 kóshe qaıta jańǵyrtylady, jańa aıaldamalar ornatylady. Qoǵamdyq kólik salasyndaǵy sýbsıdıalaý nátıjesinde kondýktorlar men júrgizýshilerdiń eńbekaqylary kóterildi.
-Turǵyndar tarapynan qoǵamdyq kólik qyzmetine, kondýktorlar men júrgizýshilerdiń dórekilikterine qatysty shaǵymdar bar. Baqylaýdy kúsheıtip, oryn alǵan máselelerdi ýaqytyly sheshý kerek. Jolaýshylardan áleýmettik jelilerdegi shaǵymdar azaıyp keledi, biraq bar, bul áli de osy baǵyttaǵy jumystardy jetildirý kerektigin kórsetedi,- dedi jınalǵandarǵa Nurlan Noǵaev.
Atyraý oblysy aýdandarynda jolaýshylar tasymalyna qatysty jumystar kóńil kónshitpeıdi. Jolaýshylar avtobýsy tek Jylyoı aýdanyna qatynaıdy. Basqa aýdandarǵa taksı ǵana júredi. 
-Oblystyń barlyq aýdandarynda qoǵamdyq kólikti sýbsıdıalaý máselesin qarastyrý qajet. Mysaly, Isataı, Mahambet, Inder aýdandaryna baratyn joldardyń jaǵdaılary jaqsy, osy baǵyttarǵa jaıly avtobýstar shyǵarý kerek. Aýyl turǵyndary tarapynan suranys joǵary bolatynyna senimdimin,-dedi aımaq basshysy.
Jınalysty qortyndylaǵan Nurlan Noǵaev qaramaǵyndaǵylarǵa qoǵamdyq tasymal salasynda baqylaýdy kúsheıtýdi tapsyrdy. Avtobýstardyń qatysýymen bolatyn JKO azaıtyp, jańa kólikti kútip ustaý, jolaýshylarǵa jaıly jaǵdaı jasaý maqsatyndaǵy jumystar qatań qadaǵalanady.
