Trenıńtiń modýli halyqaralyq talaptar men tájirıbelerge sáıkes qurylyp, respýblıka aımaqtarynda qoǵamdyq baqylaýshylarǵa dáris bere alatyn trenerler daıyndaýǵa negizdelgen.

"Amanat" platformasy qyzmetiniń basty baǵyty týraly tanystyrylym baqylaýshy shtab tóraǵasy Murat Ábenovtyń, "Amanat" platformasynyń Almaty qalasy boıynsha shtabynyń basshysy Qazybek Shaıh jáne ádisteme avtory Shyńǵys Lepsibaevtyń qatysýymen ótti. İs-sharaǵa 250-den astam adam qatysty.

"Trenıńtiń maqsaty – azamattardy saılaýdyń ótkizilýi kezinde ǵana emes, oǵan deıin de monıtorıń pen baqylaý júrgizýdi úıretý. Biz 1100 eriktilerden qurylǵan tizim jasadyq. Onyń ishinde Almaty qalasynyń 26 ÚEU jáne Qazaqstan halqy Assambleıasynyń 12 etnomádenı birlestik ókilderi, qalalyq JOO stýdentteri bar. Bir-birin aýystyryp yńǵaıly jumys isteý úshin baqylaýshylar sany saılaý ýchaskelerine qaraǵanda kóbirek bolýy kózdelgen", – dedi Qazybek Shaıh.

Osy kezeńde "Amanat" platformasy adamdardy monıtorıńti durys júrgizýdi úıretýge jumyldyrylǵan. "Amanat" baqylaýshylary ashyq saılaý ýchaskeleriniń jabdyqtalǵany, ýchaskeniń ornalasý yńǵaılylyǵy, múmkindigi shekteýli adamdarǵa qoljetimdiligin qaraıdy.

"Qazirgi ýaqytta elimizdiń barlyq aımaqtarynda "Amanat" platformasynyń fılıaldary ashylǵan. Bul qoǵamdyq platformany qurý týraly ıdeıanyń jaqtaýshylary óte kóp. Ókinishke oraı kóptegen azamattar óz quqyqtary men eldegi zańnamalardy jaqsy bile bermeıdi. Osyǵan oraı biz qyzyǵýshylyq bildirgenderdi jigerli túrde úıretýdi bastadyq. Kóptegen semınarlar túrli spıkerlerdiń qatysýymen onlaın túrde ótýde. Qazirgi ýaqytta respýblıka boıynsha 10 myńnan astam táýelsiz baqylaýshy bilimin jetildirýde", – dep sóz sóıledi Murat Ábenov.

"Amanat" platformasynyń belsendileri áleýmettik jeli, baspa jáne elektrondyq BAQ arqyly saılaýǵa baqylaýshy retinde qatysýǵa nıet bildirýshilerge úndeý jasady.

"Eń jeńili amanat.kz saıtyna kirip ótinish berý. Erikti óz qalaýy boıynsha saılaý aldy, sondaı-aq saılaý barysyndaǵy monıtorıńke qatysa alady. Árbir qala turǵyndary daýys berý joldary, úmitkerlerdiń múmkindikteri men teń quqyqtary jóninde úıretý kýrstaryna qatysa alady. "Amanat" toby kez-kelgen Prezıdenttikke úmitker retinde tirkelgen kandıdatqa qala turǵyndarynyń tilekterin jınaýmen de aınalysady", – dep sózin támamdady Qazybek Shaıh.

Budan bólek, Murat Ábenov bastaǵan qoǵamdyq platforma ókilderi Almaty qalasynyń aýmaqtyq saılaý komısıasynyń tóraıymy J. Asanovamen baqylaýshylardyń jumysyn tıimdi uıymdastyrý máselesi boıynsha kezdesken bolatyn.

Esterińizge sala ketsek, "Amanat" qoǵamdyq platformasy – saılaýdyń adal jáne ashyq ótýin qalaıtyn qazaqstandyqtardan qurylǵan táýelsiz erikti uıym. Quramyna qoǵam belsendileri, ekspertter, jýrnalıster men qoǵamdyq uıymdar ókilderi bar.