Ýkraınanyń jańa saılanǵan prezıdenti Vladımır Zelenskıı qyzmetke kiriskennen keıin memlekettik rezıdensıany paıdalaný quqyǵyna ıe. Alaıda prezıdent, ol jerde turýǵa qushtar emes ekendigin jáne ony «balalarǵa berý» múmkindigin qarastyryp jatqanyn málimdedi, dep jazady Qamshy.kz aqparat agenttigi RIA Novostı saıtyna silteme jasap.

Jańa prezıdenttiń aldaǵy ýaqytta qaıda turatyny qupıa kúıinde qalyp otyr. Alaıda qazirgi tańda Ýkraınanyń jańa basshysy Kıev mańyndaǵy Ivankovıch aýylyndaǵy elıtaly "Pomeste" qalashyǵyndaǵy óz kotejinde turyp jatyr.

Onyń málimdemesine sáıkes, Zelenskıı aýdany 353 sharshy metr bolatyn úıdi 2008 jyly 815 myń grıvenge (shamamen 31 myń dollar) satyp alǵan.

Eger Zelenskıı qyzmetke ornalasqannan keıin óz úıinde qalýdy sheshse, prezıdent ákimshiligine deıin otyz shaqyrymdyq jerdi júrip ótýine týra keledi. Eger keptelisterdi eseptesek, bir-bir jarym saǵatta jetedi.

Zelenskıı keptelis týyndatpaý úshin, prezıdent ákimshiligin Kıevtiń ortalyǵynan basqa jerge aýystyrý oıy bar ekenin málimdegen.

«Kepteliste turý – sumdyq. Saıasatkerler úshin ne sebepti halyq qınalýy kerek? Men rezedensıany keptelis bolmaıtyn jerge aýystyramyn. Jaı ǵana Kıevten basqa jerge kóshiremin», - degen bolatyn Zelenskıı.

«Men rezedensıada turýdyń eshqandaı sebebin kórip turǵan joqpyn. Mysaly, siz ben biz Eýropaǵa bara qalsaq, úlken korólderdiń rezedensıalaryn kóremiz. Ol qazir ne? Onyń barlyǵy tek qana aralap, tamashalaýǵa arnalǵan oryndarǵa aınalǵan», - dedi.

Daıyndaǵan: Marjan Sábet