Qurmetti aǵaıyndar, bul saılaý, burynǵy saılaýdan ózgerek! Óıtkeni, el oıana tústi, jer-jerde belsendilik artýda, ony kózimiz kórip otyr. Ózgermegen bılik qana, olar áli de sol ózderiniń ákimshilik resýrstaryna súıenip, burynǵysha oılaryna kelgenin istemek. Ákimshilik resýrs degenimizdiń bári "ákimqara" emes, sol baıaǵy mektep, aýrýhana t.b. búdjettik mekeme qyzmetkerleri.
Men búgin sol sanattaǵy azamattarǵa ÚNDEÝ jasaǵym keledi!
Qurmetti búdjettik sala qyzmetkerleri!
Sizder jyldar boıy bıliktiń aıtqanyn qylamyz dep, halyqtyń daýysyn urlaýǵa, saılaý nátıjelerin burmalaýǵa eriksiz at salysyp keldińizder. Ol úshin osy kezge deıin eshqaısyńyz qylmystyq nemese basqalaı jaýapkershilikke tartylmadyńyzdar, tipti ol úshin jaýapkershilik kózdelgenin bilmegen de bolarsyzdar.
Alaıda, búginde zaman ózgerdi, aınalaǵa kóz salyp qarasańyz, kúni keshegi ózimiz sıaqty kóptegen elder sóz júzinde emes, is júzinde avtokratıadan bas tartyp, demokratıalyq jolǵa túsýde. Ol ózgerister Qazaqstandy da aınalyp ótpek emes! Basqasyn aıtpaǵanda, qazir jer-jerde el bolashaǵyna beı-jaı qaraı almaıtyn, táýelsiz baqylaýshylar toby iske kiriskeli jatyr. Buryn-sońdy eshbir saılaýda el halqy dál bulaısha, bilek sybanyp, belsendilik tanytqan emes. Onyń ústine qazirgi tehnıkalyq jetistikter (smartfon, ártúrli túsirý, jazý qabileti bar quraldar) baqylaýshylar jumysyn jeńildetip, "daýys urlaý" mehanızmin "qıyndata" túspek. Osyǵan oraı zańger retinde Sizderdi saılaý barysynda bıliktiń las jumysyna aralasýdan kesimdi túrde bas tartýǵa shaqyramyn, sonymen qatar saılaý zańdylyǵyn buzǵany úshin qoldanystaǵy qylmystyq kodekspen naqty jaýapkershilik kózdelgenin de eskertemin! Bıliktiń las tehnologıasyna aralasýdan bas tartyńyz! Sol Sizderdiń el bolashaǵyna qosqan úlesterińiz bolsyn! Sol arqyly ári ózderińizdiń jeke bastaryńyzdyń qaýipsizdigin qamtamasyz etesizder! Sizderdi zańsyz ári las isterge ıtermelegisi kelgen sholaq belsendilerge qylmystyq kodekstiń myna baptaryn kórsetińiz, eger oǵan qaramastan zańsyz áreketter jalǵasqan jaǵdaıda, olardyń beınesin nemese daýysyn jazyp alyńyzdar, ol sharalar bolashaqta ózderińizdi qorǵaýǵa qajet bolmaq!
Qurmetpen zańger Abzal Quspan
150-bap. Saılaý quqyqtaryn júzege asyrýǵa nemese saılaý komısıalarynyń jumysyna kedergi jasaý
1. Azamattyń óziniń saılaý quqyqtaryn nemese referendýmǵa qatysý quqyǵyn erkin júzege asyrýyna kedergi jasaý, sondaı-aq saılaý komısıalarynyń nemese referendým ótkizý jónindegi komısıalardyń jumysyna zańsyz aralasý jáne daýys berýge, kandıdatty, partıalyq tizimderdi tirkeýge, daýystardy sanaýǵa jáne saılaýdaǵy nemese referendýmdaǵy daýys berý nátıjelerin aıqyndaýǵa baılanysty mindetterin atqarýyna kedergi jasaý –
bir júz aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna ne bir júz jıyrma saǵatqa deıingi merzimge qoǵamdyq jumystarǵa tartýǵa jazalanady.
2. Mynadaı:
1) paraǵa satyp alýmen, aldaýmen, kúsh qoldanýmen ne ony qoldaný qaterin tóndirýmen ulasqan;
2) adam óziniń laýazymdyq jaǵdaıyn nemese qyzmet babyn paıdalana otyryp jasaǵan;
3) aldyn ala sóz baılasý arqyly adamdar toby nemese qylmystyq top jasaǵan;
4) elektrondyq saılaý júıesi jumys isteýiniń belgilengen tártibin buzý jolymen jasalǵan dál sol is-áreketter –
tórt myń aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna ne tórt jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanady.
151-bap. Saılaý qujattaryn, referendým qujattaryn burmalaý nemese daýystardy durys eseptemeý
1. Saılaý qujattaryn nemese referendým qujattaryn burmalaý, búletenderge nemese qol qoıylǵan paraqtarǵa jalǵan jazbalar engizý, daýystardy kórineý durys eseptemeý ne saılaýdyń nátıjelerin nemese referendým qorytyndylaryn kórineý durys aıqyndamaý ne daýys berý qupıasyn buzý, eger bul is-áreketterdi Qazaqstan Respýblıkasynyń Prezıdentine kandıdattyń senim bildirilgen adamy nemese depýtattyqqa kandıdattyń senim bildirilgen adamy, sol sıaqty saılaý komısıasynyń nemese referendým ótkizý jónindegi komısıanyń múshesi jasasa, –
belgili bir laýazymdardy atqarý nemese belgili bir qyzmetpen aınalysý quqyǵynan úsh jylǵa deıingi merzimge aıyra otyryp nemese onsyz, tórt myń aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna ne tórt jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanady.
2. Elektrondyq saılaý júıesi jumys isteýiniń belgilengen tártibin buzý jolymen jasalǵan dál sol is-áreketter –
jeti jylǵa deıingi merzimge bas bostandyǵynan aıyrýǵa jazalanady.
Abzal Quspannyń feısbýktegi paraqshasynan
