Atyraý oblysynyń ákimi Nurlan Noǵaev Jaıyq- Kaspıı basseıinindegi túbtazalaý jumystarynyń barysymen, «Aq Jaıyq» tabıǵı rezervatyndaǵy balyq ótý arnasynyń jaı- kúıimen tanysyp, buryńǵy «Atyraýbalyq» zaýytynyń da aýmaǵyna baryp qaıtqan bolatyn dep jazady Qamshy.kz aqparat agenttigi.
Túbtazalaý jumystarynyń merdigeri «Pavlodar ózen porty» AQ óz jumystaryn Jaıyq ózeni saǵasyndaǵy Iaıskıı kanaly men Qıǵashtyń Ganúshkın jáne Jarqosyn kanaldarynda júrgizip keledi.
Bul, kóktemde ýyldyryq shashý úshin balyqtardyń ózenge ótetin negizgi arnalary. Olar on shaqty jyldar tóńireginde tazalanbaǵan, sonyń saldarynan taıyzdanyp ketipti.
«Mynaý ýaqtyly qolǵa alynǵan jumystar jáne olardyń mańyzdylyǵy da óte joǵary»,- dep atap ótti aımaq basshysy.
Túbtereńdetý jumystarynyń jalpy uzyndyǵy bul jerde shamamen 45,5 km. quraıdy. Onyń ústine, teńiz baǵytyna qaraı tereńdigi 2,5 metr, eni 25 metrdi quraıtyn jańa kanaldyń qurylysy qarastyrylǵan.
Osy sapar qorytyndysymen oblys ákimi Nurlan Noǵaev «Aq Jaıyq» tabıǵı rezervaty aýmaǵynda týrızmdi damytý jáne qosymsha baqylaý qosyndaryn ornatý jóninde tapyrmalar berdi. Qosyndardy ornatý sońǵy ázirde jıilep ketken dala órtteriniń jáne balyq saýdasynyń zańsyz aınalymynyń aldyn alýǵa septigin tıgizedi.
— Shyǵyndy az talap etetin bul qurylym rezervat qyzmetkerleriniń jumysyn ári jeńildetip, ári tıimdiligin arttyrady. Onyń ústine, alys qashyqtyqty da qadaǵalaýǵa múmkindik beretin arnaıy drondardy satyp alýdy da qarastyryńyzdar. Biraq, bunyń barlyǵy da jergilikti ań men qustarǵa keseli men kedergisin tıgizbeýi kerek. Serik Jambyluly, osy jyldyń sońyna deıin qosymsha qadaǵalaý qosyndaryn salý men drondardy satyp alyp berý jaǵdaıyn oılastyryńyz,- dep ákim tapsyrma berdi.
«Aq Jaıyq» tabıǵı rezervatynyń basshysy Nurbolat Kárimovtyń sózine qaraǵanda, oblys ákiminiń týrızmdi damytý baǵytyndaǵy tapsyrmalaryn oryndaý barysynda, rezervat aýmaǵynda birneshe týrısik baǵyttar jasaqtalyp jatqan kórinedi. Sonymen qatar, balyq qorǵaý boıynsha da kóptegen sharalar júzege asyrylyp, «Bekire- 2019» aldyn alý- jedel áreketteri boıynsha da bekitilgen ister atqarylyp keledi eken.
— «Bekire-2019» sharasy bastalǵannan beri balyq saýdasynyń zańsyz aınalymyna qatysty ákimshilik quqyqbuzýshylyq baǵytynda 49 fakti tirkelgen. Mysaly, ótken jyldyń osy kezeńimen salystyrǵanda 26 fakti anyqtaldy. Onyń ishinde, ýyldyryq shashý kezinde balyq aýlaý men rezervat aýmaǵynda bolý sekildi jaǵdaılar da tirkelgen. Týrısk baǵyttarǵa keler bolsaq, qoryqtyq aımaqta bizder arnaıy súrleý joldar júrgizgenbiz. Qyzmetkerlerimizdiń kómegimen týrıser rezervat aýmaǵynda serýendep, arnaıy motorly qaıyqtarmen Kaspıı teńizine de shyǵýǵa múmkindik qarastyrylǵan. Sonymen qatar, arnaıy belgilengen jerlerde salmaǵy bes keliden aspaıtyn balyqtardy da qarmaqqa aýlaý ruqsat etilgen. Rezervatqa zor qyzyǵýshylyqty shet eldik týrıser tanytyp otyr. Qazir ınfraqurylymdy damytý jaǵyn qarastyrýdamyz, - deıdi Nurbolat Kárimov.
Buryńǵy «Atyraýbalyq» zaýytyna barǵan kezde anyqtalǵanyndaı, qazir kásiporynnyń balanstyq qunyn anyqtaý sharalary júrgizilip jatqan kórinedi. Syrttaı qaraǵannyń ózinde de, zaýyt nysandary men ǵımarattary turǵyndarǵa qaýip tóndirip turǵany baıqaldy. Apatty ǵımarattar qulaýdyń az – aq aldynda tur.
Bos qalǵan kásiporyn aýmaǵynda aımaq basshysy sısternalardan mazýttyń tógilip jatqanyna nazar aýdartty.
— Bul Jaıyq ózeni jaǵasyna taıaý jer, aǵylyp jatqan maı tabıǵatqa zıanyn tıgizýde. Sizdiń qyzmettik maqsatyńyzdyń quzyryna oryn alǵan kemshilikterdi anyqtaý ǵana emes, solardy joıý de kiredi. Tabıǵatqa keltirilgen eleýli nemese eleýsiz zalaldyń bolmaıtyny týraly jaýapkershilikti jiti túsingen abzal. Tabıǵatqa keltirilgen zalal- orny tolmaıtyn nemese zalasyzdandyrylýy óte kúrdeli apattar. Taıaý arada jerdi mazýttan tazalaýǵa daıyndaý qoıý kerek,- dedi Noǵaev.
Atyraý qalasynyń ákimi Álımuhammed Quttymuratuly naqtylaǵanyndaı, buryńǵy balyq óńdeý zaýytynyń aýmaǵy qalalyq ákimdikke qaraıdy eken, balanstyq quny anyqtalǵan soń, munda jańa yqsham aýdan salyný josparlanýda eken.
Usynǵan: Ásel Bolatqyzy
