Bilim berý salasy qyzmetkerlerimen ótken jınalys barysynda Atyraý oblysynyń ákimi Nurlan Noǵaev qazirgi jaǵdaı túbegeıli sharalardy talap etip turǵanyn atap ótti, - dep habarlaıdy Qamshy.kz aqparat agenttigi Atyraý oblystyq Óńirlik komýnıkasıalar qyzmetiniń deregin negizge alyp.
Nurlan Noǵaev aımaqtaǵy bilim berý sapasynyń kóńil kónshitpeıtinin aıtty.
— Bul áńgime lıseıler men gımnazıalarǵa da qatysty. Ol jerlerde naǵyz laıyqty shákirtter oqýlary tıis. «Ekige», «úshke» oqıtyndardy shyǵarý kerek. Gımnazıalar men lıseılerdiń erekshelikteri de sol. Alaıda, Telegram chatta maǵan kelgen hattardyń arasynda lıseıler men gımnazıalarda dırektorlarǵa, muǵalimderge qysym kórsetip, jaqsy baǵa qoıýdy suraıtyn «pysyq» ata-analardyń úshke oqıtyn balalary bar ekeni týraly jazǵan, - dedi Nurlan Noǵaev.
Atyraý oblysynyń ákimi bilim berý basqarmasynyń basshylyǵyna ár oqý ornyndaǵy jaǵdaıǵa jete mán berip, jan-jaqty tekserý júrgizýdi tapsyrdy.
— Oqý oryndarynda bilim sapasynyń tómendep ketkeni týraly shaǵymdar kóp. Muny toqtatý kerek. Bilim berý salasyndaǵy jaǵdaıdy túbegeıli ózgertý qajet. Ár lıseı men gımnazıaǵa tekserý júrgizý kerek, - dep atap ótti Nurlan Noǵaev.
Aımaq basshysy bilim berý basqarmasynyń basshysyna lıseıler men gımnazıalardaǵy jaǵdaıǵa monıtorıń júrgizýdi tapsyrdy. Eger lıseı nemese gımnazıa sapaly jáne qajet bilim bermese, jalpy bilim beretin mektep mártebesin qaıtaryp berý kerek.
Bilim berý basqarmasy basshysynyń mindetin atqarýshy Jansulý Tóremuratova qazirgi ýaqytta jasalyp jatqan jumystar jaıly baıandady.
— Ár mektep dırektoryna oqýshylardyń ata-analarymen tyǵyz baılanysta bolý tapsyryldy, mektepter ashyq jáne qoljetimdi bolýy tıis. Ata-analarmen ózara baılanysta bolý arqyly bilim sapasyn joǵarylatýǵa qol jetkize alamyz, - dedi J.Tóremuratova.
Nurlan Noǵaev bul bastamany qoldap, tujyrymdama daıyndap, bilim berý salasy qyzmetkerlerin, pedagogtar men dırektorlardy attestasıadan ótkizýdi tapsyrdy.
— Sońǵy ýaqytta bilim berý sapasyna qatysty shaǵymdar kóbeıip ketti. Bizdiń oblysymyz respýblıka boıynsha tómen kórsetkish kórsetti. Telegram chatta turǵyndar jıi aryzdanady. Pedagogtarǵa, barlyq bilim berý salasynyń qyzmetkerlerine attestasıa ótkizýdi jáne «kezdeısoq» adamdardan aryltýdy tapsyramyn, - dedi Nurlan Noǵaev.
Jınalys barysynda oblys ákimi Telegram qosymshasyndaǵy «Atyraý oblysynyń ákimdigi» chat-kanalyna ata-analardan kelip túsken shaǵymdardy oqydy.
— Sonyń biri – aqyly qashyqtyq olımpıadasy. Muǵalimder úgit jumystaryn júrgizbeýleri kerek, eger ata-ana ózi qalasa, aqshasyn tólep, balasyn qatystyra alady. Mektepte eshqandaı alym-salyq bolmaýy tıis. Jyl saıyn bilim berý salasyna kóp kólemde qarajat bólemiz, mektepterde aqsha jınalmaýy kerek. Bárine osyny tapsyramyn,-dedi aımaq basshysy.
Atyraý oblysynyń bilim salasyndaǵy baqylaý departamentiniń jumysyna qatysty da kóp saýaldar qoıyldy. Departamenttiń basshysymen qosa barlyq qyzmetkerleri balalarǵa bilim berý prosesine belsendi qatysyp, usynystaryn aıtyp, mektepterde oqý prosesiniń durys bolýyn qadaǵalaýlary qajet ekeni jaıly aıtyldy.
Oblys ákiminiń birinshi orynbasary Serik Shapkenov jekemenshik balabaqshalar jaıyn qozǵady. Búginde aımaqta naqty qansha jekemenshik balabaqsha bary belgisiz.
— Ókinishke qaraı, bizde naqty qansha balabaqsha baryn, qanshasy tirkeýsiz jumys istep jatqanyn bilmeımiz. Tek memlekettik organdarǵa kelip tirkelip, memlekettik tapsyrys alǵandary ǵana belgili. Problema bar. Memlekettik tapsyrys alǵan balabaqshalar aı saıynǵy aqysyn kóterip jiberedi, bulaı bolmaýy tıis. Zań boıynsha tekserý júrgizip, jaǵdaıdy baqylaı almaımyz. Bul jumyspen bilim berý salasyndaǵy baqylaý departamenti aınalysýy tıis, biraq másele sol ózekti kúıinde qalyp tur. Men osy iske prokýratýranyń aralasyp, naqty quqyqtyq baǵasyn berýin suraımyn, -dedi Serik Shapkenov.
