Dımash saıasattan aýlaq bol! Dımash ulym! Saǵan bir aıtarym, sen qazir álem bilgen ánshisiń. Sen saıasatker emessiń. Sen elińe óneriń men ánińmen qyzmet et! Saıasattan aýlaq bol! Esh qandaı partıaǵa, saıası qozǵalystarǵa múshe bolma! Seniń partıań qazaq halqy! Seniń ıdeıań qazaqtyń óneri, onyń qundylyqtary!
Prezıdent saılaýyna túsip jatqan eshbir kandıtatty qoldap, konsertine qatyspa! Eldegi kórermenderińniń kóbinen aırylasyń!
Men seniń esińe saıasattyń qurbany bolǵan álem biletin ánshilerdi salaıyn. Uly ánshi Marıo Lans ıtalıanyń mafıozyna qarsy kelgeni úshin, amerıkalyq ánshi Dın Rıd — atomǵa jáne Vetnamdaǵy soǵysqa qarsy bolǵany úshin, Vıktor Hara Chılıdegi Pınochettiń áskerı tóńkerisine qarsy bolǵany úshin, rok - ánshi Tálkov Reseıdegi saıasatqa qarsy saıası ánder men óleńder jazǵany úshin qurban bolǵan. Bul tizimdi jalǵastyra berýge bolady.
Men qazaqtyń eki uly ánshisiniń saıasattyń qurbany bolǵanyn esińe salaıyn. Uly ánshi Ámire Parıjge barǵanda Alashtyń arysy Mustafa Shoqaımen kezdesip, onyń sálemin elge jetkizgeni úshin, ómir boıy ańdýda bolyp, talaı tergeý men qınaýdy basynan ótkizip, azapty qysqa ǵumyr keship, qupıa jaǵdaıda qaıtys bolǵan. Uly ánshi sovet ókimetinen ataq pen orden túrmaq, bir medal almaǵan.
Uly ánshi Kúlásh Joǵary sovettiń depýtaty bolyp júrip óziniń shyndyqty aıtatyn týra minezi bıliktiń "kózine" túsip, qysymǵa alynyp, sonyń kesirinen shet elge shyǵýǵa joly jabylyp, Máskeýde qonaq úıde qupıa jaǵdaıda qaıtys bolǵan.
Bizde osy kezdiń ózinde saıası kózqarasy úshin qýdalaýǵa túsip júrgen qanshama ónerdiń, ádebıettiń tulǵalary bar. Zaman bir ornynda turmaıdy, bári ózgeredi.
Biz qazir bala kezimizde: - kún sónedi, Lenın sónbedi! Aı sónedi, Lenın sónbeıdi! - dep, án salyp, oktábr tóńkerisine, komýnıstik partıaǵa arnap óleń jazǵanymyzǵa uıalamyz. Qazir uly aqyndarymyz ben uly jazýshylardyń, uly kompozıtorlardyń Lenınge, Markske, Stalınge arnap jazǵan shyǵarmalaryn jas urpaqtan jasyryp, olardyń kitaptarynyń "kózin qurtyp" jatyrmyz. Qoǵam ózgeredi, búgingi kúnniń kósemine, Astanaǵa arnap jazǵan óleńderimizben, ánderimizden urpaq aldynda uıalatyn kún týady. Sol úshinde men saǵan saıasattan alys bol! - deımin! Jaǵympazdyq bizben ketsin.
Aımuhanbet Beısembekovtyń feısbýk paraqshasynan alynǵan
Usynǵan: Ásel Bolatqyzy
