Qazaqstannyń Bas prokratýrasy qazaqstandyqtardy saılaý týraly zańnyń talaptaryn buzbaýǵa shaqyrdy dep habarlaıdy Qamshy.kz aqparat agenttigi QR Bas prokýratýrasynyń baspasóz qyzmetine silteme jasap.

"Qazaqstan Respýblıkasynyń Bas prokýratýrasy el Prezıdentiniń kezekten tys saılaýy barysynda zańdylyqty, onyń ishinde "Qazaqstan Respýblıkasyndaǵy saılaý týraly" Konstıtýsıalyq zańda kózdelgen qoǵamdyq pikirge saýal salýdy júrgizý sharttarynyń saqtalýyn erekshe baqylaýda ustaýda", - delingen habarlamada.

Quzyrly organ ókilderiniń aıtýynsha, osyǵan deıin áleýmettik jelilerde saılaýǵa qatysty saýalnama júrgizgen birneshe quqyq buzýshylyq faktileri tirkelgen. Nátıjesinde, quqyq buzýshylar ákimshilik jaýapkershilikke tartyldy.

"Atap aıtqanda, 17 mamyrda "VKontakte" áleýmettik jelisinde saılaý boıynsha qoǵamdyq pikirge saýal salǵany úshin (ÁQBtK 120-baby 3-tarmaǵy) Almaty qalasynyń turǵyny 15 AEK mólsherinde (37 875tg) aıyppul tóleýge tartylǵan. Osyǵan uqsas "Facebook" áleýmettik jelisinde jasalǵan quqyq buzýshylyq úshin Almaty oblysynyń turǵyny ákimshilik jaýaptylyqqa tartyldy", - dedi prokýrorlar.

Habarlama sońynda prokýratýra ókilderi, azamattarǵa muqıat bolyp, áleýmettik jelilerdegi jeke akkaýnttaryn úshinshi tulǵalardyń quqyqqa qaıshy maqsattarda paıdalanýyna jol bermeýge shaqyrdy.

Usynǵan: Dáýren Sybanbaı