Osydan bir aı buryn T. Júrgenov atyndaǵy Qazaq Ulttyq óner akademıasynyń estrada fakúltetinde XXVIII Halyqaralyq «Slaván bazary Vıtebsk — 2019» óner festıvaline ulttyq irikteý kezeńi ótken bolatyn dep habaraıdy Qamshy.kz aqparat agenttigi T. Júrgenov atyndaǵy Qazaq Ulttyq óner akademıasynyń baspasóz qyzmetiniń málimetine súıenip.
İrikteýge elimizdiń túkpir-túkpirinen kelgen 36 ónerpaz qatysty. Ádilqazylar alqasynyń quramynda Akademıa rektory Asqat Maemırov, Akademıanyń estrada fakúltetiniń dekany Baǵym Muhıtdenova, Akademıanyń shyǵarmashylyq jumystar jáne halyqaralyq baılanystar jónindegi prorektory, belgili ánshi Sáken Maıǵazıev, tanymal estrada oryndaýshysy Álisher Kárimov jáne «Slaván bazary» festıvaliniń aımaqtyq resmı ókili Qarlyǵash Ábdikárimova boldy.
Ádilqazylar alqasy aqtyq synǵa jibergen 18 ánshiniń arasynan eń kóp upaı jınaǵan eki úmitker — Akademıanyń estrada óneri fakúltetiniń úshinshi kýrs stýdentteri Erik Tólenov pen Ádilhan Makın jalǵyz joldamany ózara sarapqa salǵan.
Olardy qosymsha tyńdaý úshin eki apta daıyndyq kezeńi berildi. Qosymsha tyńdaý kezinde Ádilhan Makındi neǵurlym ornyqty jáne oryndaý máneri boıynsha senimdi shyqty dep tapqan ádilqazy músheleri halyqaralyq festıválge atalmysh ónerpazdy jiberýdi uıǵardy.
Osy oraıda festıvál ókili Qarlyǵash Ábdikárimova kelesi jylǵy festıválge aldyn ala tyńdaýsyz Erik Tólenovtyń baratynyn habarlady.
Mamyrdyń 14-19 kúnderi aralyǵynda Erik Rýmynıanyń Braıla qalasynda ótken vokalısterdiń Georgıı Grıgorıý atyndaǵy halyqaralyq festıvaline qatysty, al dál osy kúnderi Ádilhan Makın Bolgarıanyń Dobrıch qalasynda ótken "Sarandev - 2019" XXVIII halyqaralyq pop-rok eýropalyq jastar baıqaýynda baq synady. Ekeýinde de nátıje aıtarlyqtaı: Erik álemniń jıyrma úsh elinen kelgen ánshiler qatysqan bedeldi saıysta ataqty rýmyn ánshisi jáne mýzykanty Georgıı Grıgorıýdyń repertýaryndaǵy ándi jańa naqyshta oryndap, konkýrstyń Gran-prı júldesin jeńip aldy, al Ádilhan Makın Bolgarıadaǵy baıqaýda júldeli 1-orynǵa ıe boldy.
Bul jerde aıta ketetin bir jaǵdaı, konkýrsqa qatysýshylar jarysqa eki jas mólsheri boıynsha tústi de, Ádilhan óz tobynda tańdaýly dep tanyldy. Biraq Gran-prı jalǵyz bolǵandyqtan ol kelesi jas mólsheri tobynda birinshi oryn alǵan, aıyqpas dertke shaldyqqan qyz balaǵa berilgen.
Erik Tólenovtiń án aıtý máneri zamanaýı pop stıline kelińkirese, Ádilhan Makın pop-rok stıline beıim. Eki ánshini de úlken óner jolyna estrada óneri PhD doktory, estrada óneri fakúlteti estradalyq vokal kafedrasynyń aǵa oqytýshysy Ianıs Kaısıdıdiń synybynda oqıdy.
«Slaván bazary» festıvaline buǵan deıin de birneshe qazaqstandyq ánshiler qatysqan. Solardyń ishinen Álisher Kárimov 3-oryn (2011 jyl), Dımash Qudaıbergen Gran-prı (2015) , Ámre (Ernar Sádirbaev) 1-oryn (2018) ıelengen edi.
Usynǵan: Marjan Sábet
