Jastar jyly aıasynda jambyldyq jastar da tyń bastamalardy qolǵa alyp, jarqyn jobalarymen jurtshylyqty súısintýde. Máselen, Jambyl aýdandyq jastar resýrstyq ortalyǵynyń qyzmetkerleri aımaqtaǵy bıik shyńdarǵa shyǵyp, elimizdiń ózge óńirlerindegi áriptesterine estafeta retinde joldaýda. Olar kezekti ret Merki aýdanyndaǵy 4200 metrlik bıiktikke kóterildi.

Jastar jyly aıasynda shyńǵa shyqqan jambyldyq jastardyń taǵy bir maqsaty ataýy joq shyńǵa Halyq jazýshysy, kórnekti qalamger Sherhan Murtazanyń esimin berý bolatyn. Olardyń bul jolǵy bastamasyna Shymkent qalasynyń álpınızm federasıasynyń basshysy Erbol Orazalın, oblystyq ulttyq sport federasıasy «Áýlıe ata» kókpar komandasynyń aýdaryspaqtan jattyqtyrýshysy Azat Jumádilov, oblystyq álpınızm jáne sporttyq týrızm federasıasynyń basshysy Nımat Mýrsaıtov, oblystyq skalolaz federasıasynyń jetekshisi Aslanbı Syzdyqov, sondaı-aq óńirdiń álpınıseri qoldaý bildirdi. Olar qar basqan, adam aıaǵy tımegen shyńǵa shyǵý úshin 4 táýlikterin jumsaǵan. Sebebi, eshkim basyp bilmegen ári qarly shyń qaýipti edi. Sondyqtan Qumbel shatqalyndaǵy shyńǵa kóterilýge umtylǵan top músheleri ár qadamdaryn ańdap basyp, 4200 metrlik núktege jetti. Osylaısha, osy shyńnyń ushar basyna Jastar jylynyń arnaıy týyn tikti.  oǵan esimin bergen. Endigi jerde Jambyl aýdany jastarynyń bastamasymen jurtqa tanylǵan shyń Halyq jazýshysy Sherhan Murtazanyń esimimen atalady.

– Jastar jylynyń aıasynda bıik shyńǵa shyǵýymyz beker emes. Sebebi, osy arqyly óńir jastarynyń nazaryn ózimizge aýdaryp, óz ómirleriniń bıigine umtylsa eken deımiz. Al 4200 metrdegi shyńǵa Sherhan Murtazanyń atyn berýimizdiń sebebi, ol kisi qazaq rýhanıatynan bólek qoǵamnyń damýyna da eleýli eńbek sińirgen biregeı dara tulǵa. Onyń esimi qazaq tarıhy men ádebıetine altyn áriptermen jazylǵany belgili. Soǵan qaramastan Jastar jylynda onyń atyn quzar shyńǵa berilýin zańdy dep esepteımiz, – deıdi Jambyl aýdandyq jastar resýrstyq ortalyǵynyń bólim basshysy Nurbek Sákenov.

Aıta keterligi, osyǵan deıin Jambyl aýdany jastar resýrstyq ortalyǵynyń  uıymdastyrýymen zamandastarymyz Jastar jylynyń jarıalanýyna baılanysty T.Rysqulov aýdany aýmaǵyndaǵy 3200 metr bıiktegi «Degerez» shyńyna órmelegen bolatyn. Osylaısha, aýdan jastary «Jas Otan» jastar qanatynyń sol kezdegi tóraǵasy Danıar Manarbekulyna jáne jastardyń janashyry, májilis depýtaty Gennadıı Shıpovskıhke, kórshiles jatqan Shymkent qalasy men  Almaty oblysynyń jastaryna óz óńirlerindegi bıik shyńdarǵa shyǵýdy usynyp, vıdeo estafeta joldaǵan edi. Qazirgi tańda olar da bul bastamany qoldap, oń nıet tanytyp otyr eken.

Baqyt Jalǵas