Elbasynyń bastamasymen jarıalanǵan Jastar jylynda elimizegi jas býyn ókilderine tolaıym múmkindikter jasalýda. Ásirese, kózinde jalyny, júreginde jarqyn bolashaqqa degen umtylysy bar azamattardyń usynystary nazarǵa alynyp, isteriniń qoldaý tabýy olardyń jigerin qaırap, qulshynystaryna qanat bitirip otyr. Bul ıgi isterden Jambyl oblysy da shet qalyp otyrǵan joq. Máselen, jýyrda aımaq basshysy Asqar Myrzahmetovtyń qaýlysymen oblysymyzdaǵy daryndy jastardyń basyn qosqan jas aqyn-jazýshylar keńesi quryldy.
Oblys ákimdigi janynan qurylǵan atalmysh keńeske oblys ákiminiń orynbasary Sulýshash Qurmanbekova tóraǵalyq etedi. Al, onyń orynbasary qyzmetin aqyn, Qazaqstan Jazýshylar Odaǵy Jambyl oblystyq fılıalynyń dırektory Hamıt Esaman atqarmaq. Hatshy bolyp aqyn, oblys ákimi baspasóz qyzmetiniń bas mamany Nurbolat Satymqul bekitildi.
Jalpy, jas qalamgerlerdiń shyǵarmashylyǵyn damytý jáne nasıhattaý baǵytynda jumys isteıtin keńes ádebıet pen óner salalarynda jastar saıasatyn jetildirý, ádebı forýmdar, múshaıralar men ózge de sharalar ótkizý, atalǵan baǵyttaǵy uıymdarmen baılanys ornatyp, jumys júrgizý sekildi máselelerdi de nazarǵa alady. Jergilikti atqarýshy organdarǵa mádenıet salasynda týyndaǵan suraqtar boıynsha konsýltatıvti kómek kórsetedi. Sondaı-aq, Qazaqstan Respýblıkasy Mádenıet jáne sport mınıstrligine mańyzdy dep tapqan máseleleri boıynsha usynystar berýge de quqyly.
Keńes quramyna oblysymyzǵa ǵana emes, elimizdiń kóleminde esimderi tanymal qalamgerler engen. Keńes músheleri qatarynda aqyndar – «ARAI» gazeti bas redaktorynyń orynbasary Tursynbek Sultanbekov pen bólim basshysy Nurjan Qadiráli, «Aq jol» gazeti bas redaktorynyń orynbasary Asqat Raıqul, bólim basshysy Tabıǵat Abaıldaev, Danıar Álimqul, Janǵazy Ahmet, Nurbolat Joldasbek, Maral Isaqulova, Ernar Ábdirazaq, Araıly Jaqsylyq, Qurbanáli Shahabaılar bar. Sondaı-aq prozaıkterden Ardaq Úseıinova, Qanat Tilepbergenov, «ARAI» gazetiniń tilshileri – Talǵat Nurhanov pen Shynbolat Kúzekbaevtar keńes músheleri atanǵan.
Osylaısha jańadan qurylǵan keńes óńirdiń rýhanıatyn damytýǵa, jastardyń shyǵarmashylyǵyn shyńdaýǵa ózindik úlesin qosatyn bolady.
Baqyt Jalǵas
