Elbasy N.Nazarbaev «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda «Sońǵy jyldary biz «Nurly jol» baǵdarlamasy boıynsha respýblıkalyq mańyzy bar ınfraqurylym qalyptastyrdyq. 2015 jyldan bastap 2400 shaqyrym avtomobıl joly salyndy jáne qaıta jóndeldi. Bul jumystar jalǵasýda jáne 2020 jylǵa deıin qosymsha 4600 shaqyrym jol paıdalanýǵa beriledi» dep atap kórsetkeni belgili.
Joldaýdan týyndaǵan mindetter Jambyl oblysynda da oıdaǵydaı iske asýda. Onyń naqty bir dáleli -«Merki-Býrylbaıtal» avtojolyn jańǵyrtý jumystarynyń bastalýy.
Ashyǵyn aıtý kerek, «Merki-Býrylbaıtal» tas jolynyń múshkil kúıi talaı jyldan beri temir tulpar tizgindegenderdiń janyna batyp keledi. Mine, osyny eskergen el bıligi bıyl uzyndyǵy 262 shaqyrymdy quraıtyn «Merki-Býrylbaıtal» avtojolyn qaıta jańǵyrtý jumystaryn qolǵa aldy.
Jalpy, atalmysh tas jolynyń boıyndaǵy qurylys 4 ýchaskege bólingen. Onyń ishinde Merki kentinen Shý qalasyna deıingi jol qurylysy 86 shaqyrymdy quraıdy. Jáne asfált jabyndy tórt jolaqty qozǵalysqa arnalyp tóselmek. Al Shý qalasynan Býrylbaıtalǵa deıingi jol 176 shaqyrymdy qamtymaq. Munda eki jolaqty İİ-shi tehnıkalyq sanattaǵy jol salynady.
Tolyǵymen jańartylǵan avtomobıl joly Tátti, Shý, Birlik eldi mekenderi arqyly ótedi dep kútilýde. Qaıta qurý jobasy aıasynda kúre joldyń boıynda 6 kópir, 3 temirjol ótkeli, 11 jaryqtandyrylǵan kólik aıryǵy, 276 sý ótkizý qubyrlary, demalys alańdary jáne avtopavılon salynady. Jáne erekshe aıta keterligi, «Merki-Býrylbaıtal» avtojolynyń qurylysyna tózimdiligi joǵary qıyrshyq tas-mastıkalyq asfalbeton paıdalanylmaq. Jobany tolyqtaı aıaqtaý 2022 jyldyń maýsym aıyna josparlanyp otyr.
Bul sóz joq, bas barmaqpen baǵalaýǵa turarlyq . Sebebi atalmysh avtojol búginde eldi mekender arasyn baılanystyryp ǵana qoımaı, óńiraralyq qatynasta da aıryqsha ról atqarýda. Ári bul joba kóptiń tileýi qabyl bolǵanyn kórsetip tur.
Halyq danalyǵynda «Jaqsy bastalǵan is-jartylaı bitken is» degen sóz bar. Al, josparlanǵan jumystar oıdaǵydaı júzege asqan jaǵdaıda ońtústik aımaqtar men elordanyń aralyǵynda kólik qatynasy áldeqaıda jaqsarady túsetindigi sózsiz. Endeshe qurylysy qarqyn alǵan megajobanyń jemisin kóretin kúnge jetkizsin dep tileıik.
Baqyt Jalǵas
