Jastyq shaq – adam ómiriniń eń qyzyqty ári eń jaqsy kezeńi ekeni belgili. Ústimizdegi jyl — Elbasy Jarlyǵymen "Jastar jyly" bolyp bekitilgeni belgili. Jastar saıasaty jastardyń bilim, eńbek jáne jumyspen qamtý, densaýlyq saqtaý salasyndaǵy áleýmettik quqyqtaryn qamtamasyz etýge, shyǵarmashylyq áleýetin damytýǵa, jastardy aýqymdy áleýmettendirý jáne patrıotızm qundylyqtaryn qalyptastyrý úshin jaǵdaı jasaýǵa baǵyttalyp otyr. Osy oraıda, Jambyl oblysynyń Baızaq aýdanynda da atqarylyp jatqan jumystar aýqymdy. Bul týraly aýdan ákimi Rahmatildá Rahmanberdıev áńgimelep berdi.
— Búgingi kúni aýdanda jalpy turǵyndar sany 105827 bolsa, onyń 25 365-i 14 pen 29 jas aralyǵyndaǵy jastardy quraıdy, nemese 24,4 paıyz. Memlekettik jastar saıasatynyń tıimdi iske asyrylýyna jaýapty «Jastar resýrstyq ortalyǵy» mekemesin qarjylandyrý jyl saıyn ósýde. 2017 jyly 26,8 mıllıon teńge qarastyrylsa, ótken jyly - 39,6 mıllıon teńge, aǵymdaǵy jyly 44,4 mıllıon teńge qarastyryldy. Ortalyqta jalpy 25 maman qyzmet atqarady. Óńirde jastar saıasatyn júrgizýge memlekettik áleýmettik tapsyrysqa 1 mıllıon teńge bólindi,-deıdi aýdan basshysy.
Sonymen qatar, barlyq aýyldyq okýrgterde jas tolqynmen jumys júrgizetin arnaıy mamandar qamtylǵan. Olar tolyqtaı materıaldyq-tehnıkalyq bazamen qamtylyp otyr. «Jastar resýrstyq ortalyǵy» qyzmetkerleriniń áleýmettik lıftimen joǵarylaýy negizinde memlekettik qyzmetke 15 adam aýysyp, qyzmet atqarýda. Búginde aýdan boıynsha jas memlekettik qyzmetkerler sany 46 adamdy quraıdy.
Al, jastar arasynda jumyssyzdyq deńgeıin tómendetý baǵytynda túrli formattaǵy sharalar, onyń ishinde "Keńes berý alańdary" jumys jasaýda. Búgingi kúnge 1578 jasqa túrli máseleler boıynsha keńester berildi. Eger aýdan boıynsha jumyssyzdyq deńgeıi 4,5 paıyz bolsa, jastar arasynda 3,1 paıyzǵa deıin tómendetý josparlanýda.
— Aıta ketý kerek, aǵymdaǵy jyly 793 jasty jumysqa tartý kózdelip otyr. Alǵashqy toqsannyń ózinde 343 jas jumysqa tartyldy. Onyń ishinde: «Jastar praktıkasy» boıynsha 165 jas, aqyly qoǵamdyq jumysqa 50 jas, áleýmettik jumys ornyna 35, vakanttyq bos jumys oryndaryna 93 jas joldama aldy. Qysqa merzimdi kásiptik oqytý kýrsyna 30 jasty qamtý kózdelýde. Sonymen qatar kásipkerlik negizderine oqýdan ótýge 20 adam, 8 jas mıkrokredıt alatyn bolady.
Sonymen qatar «Dıplommen aýylǵa» baǵdarlamasy aıasynda 10 jas kóterme járdemaqymen, 2 jas turǵyn úı alý úshin nesıemen qamtyldy.
Sondaı-aq, «Nátıjeli jumyspen qamtýdy jáne jappaı kásipkerlikti damytýdyń 2017-2021 jyldar aralyǵyndaǵy «Eńbek» baǵdarlamasy aıasynda óz isin ashatyn 29 jasqa deıingi azamattarǵa qaıtarymsyz granttar berý boıynsha jumystar atqarylýda. Búgingi tańda jumyspen qamtý ortalyǵyna tirkelgen 117 úmitkerdiń jeteýi «Bastaý –Bıznes» jobasy, al úsheýi qysqa merzimdi úsh aılyq kásiptik oqýdy bitirip, arnaıy sertıfıkat alǵan, jobalary daıyn. Bul baǵyttaǵy jumystar jalǵasyn tabatyn bolady,-deıdi R.Rahmanberdıev.
Jastar jylynda Báıterek aýyldyq okrýginde ashylǵan jańa saıabaq ishinen "Jastar aleıasyn" ashý josparlanýda eken.
Aýdanda jastardy tárbıeleý, «Eriktiler mektebi» jobasy aıasynda volonterlardy aýdandaǵy áleýmettik jaǵdaıy tómen otbasylarǵa «Jan jylýy» atty aksıasyn jyl boıynda ótkizý de turaqty túrde uıymdastyrylmaq. Búgingi kúnge deıin aksıa aıasynda 40 adamǵa kómek kórsetilipti.
Jastardyń jaǵdaıyna tıimdi taldaý jasaý maqsatynda, jastar tólqujaty daıyndalyp jáne únemi jańartylyp otyrady. Pasportta jastardyń negizgi damý baǵyttary boıynsha statısıkalyq kórsetkishter men aqparatty-analıtıkalyq materıaldar kórsetilgen. Bul jastar salasyndaǵy jumysty jetildirýge jáne túıindi máselelerdi sheshýge kóp kómegin tıgizedi.
Qazaqta «Jas kelse – iske» degen sóz bar. Aqyldy tehnologıa zamanynda aqyl da, tyń ıdeıa da jastardan shyǵady. 2019 jyly óziniń tıimdiligin kórsetken jáne jastarmen meken-jaılyq jumysqa baǵyttalǵan jobalardy júzege asyrý josparlanýda. Atap aıtar bolsaq, jumyspen qamtýǵa járdemdesý jáne ornalastyrý, jastar kásipkerligin damytý, jastardyń bos ýaqytyn uıymdastyrý sıaqty uzaq merzimdi jobalar júzege asyrylatyn bolady.
Baqyt Jalǵas
