Aýyl-aımaqtardaǵy jastardy memlekettik baǵdarlamalarmen tanystyrý jáne sybaılastyqqa qarsy qoǵamdyq baqylaýdy kúsheıtý maqsatynda kóshpeli keńes uıymdastyrylmaqshy. «Bolashaqqa baǵdar» dep atalǵan bul kóshpeli keńestiń aldaǵy atqarar jumystaryn jýrnalıserge Óńirlik komýnıkasıalar qyzmetiniń aqparat alańynda oblys ákimdiginiń jastar saıasaty máseleleri basqarmasynyń basshysy Mádı Máten men Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttiginiń basshysy Ravıl Tólebaev tanystyrdy.
Kásipkerlik boıynsha jastarǵa jasalatyn qoldaýlardy oblys ákimdiginiń kásipkerlik jáne ındýstrıalyq-ınnovasıalyq damytý basqarmasy basshysynyń orynbasary Jandáýlet Kenjebekov málimdedi.
Kóshpeli keńeste árbir aýyl, eldi mekenderindegi jastardyń túrli sanattaryna «Dıplommen aýylǵa», «Serpin», «Bıznestiń jol kartasy», «Jastar praktıkasy» syndy memlekettik qoldaý tetikteri, bilim, jumysqa ornalasý, din, kásipkerlik bastamalardy qoldaý, aýyl sharýashylyǵy salasyn memlekettik qoldaý tetikteri, memlekettik qyzmetke ornalasý tártibi sıaqty máseleler boıynsha qabyldaýlar ótkiziledi.
Sondaı-aq, osy keńeste turǵyndardyń sybaılas jemqorlyqqa qarsy minez-qulyq úlgisin damytý men jemqorlyq máselesin memlekettik qyzmet kórsetý sapasyn arttyrý arqyly sheshý joldaryn túsindirý, memlekettik organdar qyzmetiniń ashyqtyǵyn jetkizý de kózdelgen. Ár aýdanda 3 kúnnen turaqtaıtyn kóshpeli keńes jastarmen qatar barlyq turǵyndarǵa túrli sala aıasyndaǵy máseleler jóninde keń aýqymdy túsindirý jumystaryn júrgizedi.
Tyń ıdeıaly bıznes jospary bar jastarǵa arnalǵan qaıtarymsyz 3 mıllıon teńge grant týraly da tolyqqandy málimet beriledi. Bul grantqa ótinish berýshiler ázirge az kórinedi. Eger ınovasıalyq jobasy bar jas azamattar bolsa, bıznes josparyn jasap, qaıtarymsyz grantty alyp, óz kásibin ashýǵa múmkindik bar.
— Elbasynyń tapsyrmasyna sáıkes, elimizde shaǵyn jáne orta kásipkerlikti damytýǵa aıryqsha kóńil bólinýde. Onyń ústine bıyl Jastar jyly bolǵandyqtan jastar kórsetilip jatqan kómek te kóp. Eń bastysy memleket tarapynan jasalyp jatqan osyndaı múmkindikterdi múlt jibermeý kerek. Dana qazaqta «Jas kelse-iske» degen sóz bar. Laıyqty jaǵdaı jasalyp jatqanda qol qýsyryp qarap otyrýǵa bolmaıdy. Óz isin ashyp, tirlik bastaımyn degenderge kóshpeli keńes barysynda tolyqqandy málimetter berip, baǵyt-baǵdar kórsetetin bolamyz,-deıdi oblys ákimdiginiń kásipkerlik jáne ındýstrıalyq-ınnovasıalyq damytý basqarmasy basshysynyń orynbasary Jandáýlet Kenjebekov.
Baqyt Jalǵas
