Sh. Ýálıhanov atyndaǵy Jambyl oblystyq ámbebap ǵylymı kitaphanasynda Qazaqstan Jazýshylar odaǵy oblystyq fılıalynyń uıymdastyrýymen óńirdegi jas aqyndar bas qosyp, bıylǵy Jastar jyly aıasynda atqarylatyn rýhanı shyǵarmashylyq jumystardy talqylady. Sıasy keppegen óleńderin oqyp, usynystaryn jetkizdi.
Qazaqstan Jazýshylar odaǵy oblystyq fılıalynyń tóraǵasy Hamıt Esaman bastaǵan jas aqyndar jýyrda ǵana oblystyq «ARAI» gazetinde jaryq kórgen belgili jazýshy, fılosof, ádebıet synshysy Dıdar Amantaıdyń áýlıeatalyq jastar shyǵarmashylyǵy jaıly jazylǵan synı hám tuńǵysh ret keńirek taldanǵan «Segiz aqyn:dereksiz poezıa» atty maqalasyn talqylady. Aıta ketý kerek, buryn-sońdy jambyldyq jas aqyndardyń shyǵarmashylyǵy jaıly qaýzalmaǵan bul maqala belgili jazýshy, halyqaralyq «Alash» ádebı syılyǵynyń laýreaty, shyǵarmashyl jastardyń janashyry Nesipbek Dáýtaıulynyń arnaıy tapsyrysymen ázirlengen edi.
Maqala barysynda Dıdar Amantaı qazirde respýblıkalyq deńgeıdegi talaı poezıa dodalarynda top jaryp, ádebıetsúıer qaýymǵa esimi tanylyp úlgergen Hamıt Esaman, Tabıǵat Abaıldaev, Danıar Álimqul, Janǵazy Ahmet, Nurjan Qadiráli, Araıly Jaqsylyq, Faızýlla Tóltaı, Shapaǵat Ábdirulynyń shyǵarmashylyǵyna kezdik batyrmasa da, keıbir tustaryn kertip turyp keńinen taldaǵan bolatyn.
Basqosýdy ashyp, júrgizip otyrǵan odaq fılıalynyń tóraǵasy Hamıt Esaman atalmysh maqaladaǵy oryndy aıtylǵan oralymdy oılardy ortaǵa salyp, aǵa býynnyń tarapynan osyndaı dúnıeler jas qalamgerlerge kóbirek qajet ekenin tilge tıek etti. Al oblystyq «ARAI» gazeti bas redaktorynyń orynbasary, aqyn Tursynbek Sultanbek jastardyń shyǵarmashylyǵyn qoldaý baǵytynda jastar basylymynda «Samuryq», «Talaptyń minip tulparyn» atty turaqty aıdarlardyń bar ekenin, jarıalanǵan maqalanyń jastar úshin mańyzy zor bolǵandyǵyn atap ótti. Respýblıkalyq «Jas alash» gazetiniń oblystaǵy menshikti tilshisi Nurbolat Áldıbek pen oblystyq «Aq jol» gazetiniń mádenıet jáne sport bóliminiń redaktory, aqyn Tabıǵat Abaıldaev aldaǵy ýaqytta atalǵan segiz aqynnan bólek, basqa da talantty jastardyń shyǵarmashylyǵyna turaqty túrde dál osyndaı taldaý jasalyp otyrsa degen usynystaryn bildirdi.
Budan keıin aqyndar Nurbolat Satymqul, Nurjan Qadiráli, Nurbolat Joldasbek nóserlete jyr tókti. Atalmysh maqalada shyǵarmashylyǵy taldanǵan aqyndar óz oı-pikirlerimen, usynystarymen bólisti. Basqosý barysynda Hamıt Erbolatuly oblys ákimdigi mádenıet, arhıvter jáne qujattama basqarmasy, jastar saıasaty máseleleri basqarmasy hám odaq fılıaly arasynda rýhanı áriptestik baılanystyń nyǵaıǵanyn jetkizip, ortaq maqsatta atqarylatyn birqatar sharýalardy atap ótti. Sonyń ishinde mamyr aıynda jergilikti jas aqyndar óńirdegi aýdandardy aralap, jyr kerýenin uıymdastyrý josparlanyp otyr eken. Onyń qorytyndysy oblys ortalyǵynda ótpek.
Jastar jylynda jastardyń shyǵarmashylyǵyna osyndaı basymdyq berilip otyrǵany kóńil qýantady.
Baqyt Jalǵas
