Ótken aıda óńir ákimderiniń korpýsynda qaıta taǵaıyndaýlar tabysty iske asty. Óńirlerde nebir jaǵdaılar oryn alyp, jergilikti basshylardyń kásibı daıyndyǵy synǵa tústi. Sonymen, ákimderdiń mamyr aıyndaǵy kórsetkishi «Saıasat-Monitoring» tizbektep shyqty.
Zertteýge qatysqan 27 sarapshynyń qatarynda saıasatkerler, qoǵam qaıratkerleri, blogerler, saıası tehnologtar, jýrnalıser bar. Respondentter bergen baǵa negizinde ákimderdiń jumys tıimdiligi reıtıńi túzildi. Úzdikter toby mamyr aıynda óńir basshylarynyń reıtıńinde kóshbasshy pozısıasyn taǵy da Astana qalasynyń ákimi Ádilbek Jaqsybekov saqtap qaldy. Elordada prezıdenttiń ınaýgýrasıa rásimi men ózge de aýqymdy respýblıkalyq sharalaryn joǵary deńgeıde ótkizdi.
Kóktemniń sońǵy aıy kóptegen aımaqtyń myqtylyǵyn synaǵany anyq. Osy oraıda sarapshylar astanalyq komýnaldyq mekemeler sý alý qaýpin esh qıyndyqsyz eńsergenin aıtady. Ekinshi orynǵa Almaty qalasynyń ákimi Ahmetjan Esimov jaıǵasty. Ákimder korpýsynyń ishinde Ahmetjan Smaǵululy ózi basqaratyn qalanyń ereksheligine saı qoǵam nazaryna eń kóp iligetin ókilderdiń qatarynda. Munyń barlyǵy áleýmettik jeliler men aqparat keńistiginde keıde birjaqty kórinis taýyp otyr. Jelidegi «teris» kózqarasqa qaramastan, ońtústik astananyń ákimi óz jumysyn tıimdi kórsetip-aq keledi.
Máselen, ótken aıda qala basshylyǵy toqsandyq qorytyndyny jarıalady. Atqarylǵan jumystyń nátıjesinde iri megapolıs barlyq kórsetkishter boıynsha oń damý kórsetkishterin saqtap qalǵan, bul óz kezeginde qala qazynasynyń shyǵys bóligin ulǵaıtýǵa sep boldy. Sonymen qatar, Ahmetjan Smaǵululy qalany damytýdyń 2020 jylǵa deıingi Strategıasyn ázirleýge kiriskendigin de oń nátıje deıdi sarapashylar. Al Almaty basshylyǵynyń pasıvti qorjyny Ulttyq banktiń, onymen qosa, qarjylyq ortalyq mindetiniń Astanaǵa kóshirilý máselesimen tolyǵyp otyr.
Ońtústik Qazaqstan oblysynyń ákimi Asqar Myrzahmetov mamyr aıyndaǵy reıtıńtiń shartty qola medalin ıelendi. Ótken aıda Asqar Isabekulynyń jetekshiligimen birneshe jańa óndiris orny men aýyl sharýashylyǵy qurylymdary ashyldy. Óńir basshysynyń jýrnalıser jáne qoǵam qaıratkerlerimen ótkizgen kezdesýi de sarapshylar nazarynan tys qalǵan joq. Reıtıńtiń tórtinshi pozısıasyna Qyzyloda oblysynyń ákimi Qyrymbek Kósherbaev jaıǵasty. Al ákimderdiń úzdik bestigin Aqmola oblysynyń ákimi Sergeı Kýlagın túıindep otyr.
Pikir qaldyrý