Ushatyn motosıklder 2017 jyly satylymǵa shyǵarylady.

Ǵylym men tehnıkanyń ushqan qustaı tez damýy kóptegen qıaldardy shyndyqqa aınaldyrýda. Gollıvýdtyń áıgili «Juldyzdar Soǵysyndaǵy» tańǵajaıyptardi endi ómirde kóretin bolamyz. Álem ǵalymdary ushatyn motosıklderdi birinen keıin biri jarysa jasap, kópshilikke jarıalap úlgerdi. Ótken jyly Aerofex kompanıasy 3,7 metr bıiktikke deıin kóterilip, saǵatyna jetpis kılometr jyldamdyqpen qozǵalatyn ushqysh motosıkl jasaǵanyn aıtyp, tipti Kalıfornıalyq kompanıa «Aero-X» atty hoverbaıktyń( ushatyn motosıkl) 2017 jyly satylymǵa shyǵatynna deıin jarıalap tastaǵan edi. Endi, mine, besinshi maýsym kúni « Haffıngton Post»: « Vengrıa ǵalymdary «Flike» atty ushatyn motosıkl jasap ushyrdy. Alty rotor arqyly aýada emin-erkin qozǵalatyn «Flike» 240kg júkti kóterip usha alady»,-dep jazady. «Endi adamdardyń jekeleı ushý transportyna eshqandaı kúdik-kúmán týmaıdy»... «...qaıda barǵyń kelse sonda bara alasyń, joldyń, taý-tastyń t.b kedergilerine ushyramaı dittegen jerińe hoverbaıkpen jetesiń»,-deıdi batys aqparat quraldary.

Al, «Haffıngton Post» jaqyn bolashaqta túbegeıli transporttyq ózgerister týatynyn meńzep: «kóp ótpeı baska kólikterdiń barlyǵynyń ornyn hoverbaıkter basady»,-dep jaqyn bolashaqqa boljam jasap otyr.

Aǵylshyn tilinen aýdarǵan: Talǵar DÁLELǴAZY