Elbasy Nursultan Nazarbaev «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Qazaqstan halqyna Joldaýynda «Halqymyzdyń baqýatty ómir súrýi jáne elimizdiń ozyq damyǵan 30 eldiń qataryna qosylýy – Táýelsiz memleketimizdiń máńgilik muraty» degen bolatyn. Elbasy Joldaýynan týyndaıtyn mindetterdi júzege asyrý Jambyl oblysynda joǵary qarqyn alýda. Kún sanap Áýlıeatanyń áleýeti artyp, ónim kólemi ulǵaıyp keledi. Máselen 2018 jylǵy aldyn ala derekter boıynsha oblystyń jalpy óńirlik óniminiń ósimi 1417,5 mıllıard teńgeni, ıaǵnı 3,7 paıyzdy qurap, bul respýblıka óńirleri arasynda 8-kórsetkish bolyp otyr.

Jambyl oblysy ákiminiń birinshi orynbasary Bekbolat Orynbekov respýblıka boıynsha oblystyń jalpy óńirlik óniminiń úles salmaǵy 2,4 paıyzdy quraǵanyn aıtady. Óńirlik ónimniń qurylymynda ónerkásip úlesi 17,9, aýyl sharýashylyǵy 10,2, qurylys 8, saýda 9,9, kólik 18,2, baılanys 0,7, jyljymaıtyn múlikpen jasalatyn operasıalar jáne bilim salasynyń 7,5 paıyz salymdarynyń ósimi baıqalady. Al 2019 jyldyń qańtar-sáýir aılarynyń qorytyndysy boıynsha ónerkásip óniminiń naqty kólem ındeksi 102,1 paıyzdy qurap, 154 095,8 mıllıon teńgeniń ónimi óndirildi.

Sonymen qatar, Jambyl oblysynda búdjet kiristeriniń josparyn barynsha oryndaý qarqyndy júrgizilýde. 2019 jyldyń 1 mamyryna oblys búdjetiniń kiristeri 76 mıllıard 294,1 mıllıon teńge somasynda, ıaǵnı 106,2 paıyzǵa qamtamasyz etilip otyr. Bul rette menshikti kiristerdiń jospary ótken jyldaǵylarmen salystyrǵanda áldeqaıda joǵary oryndalǵan. Máselen, kiristiń bul túrin osy esepti kezeńde 15 mıllıard 896,7 mıllıon teńgege oryndaýǵa bekinse, naqty kórsetkish boıynsha kiris 20 mıllıard 319,9 mıllıon teńgege asyp ketken. Nátıjesinde kórsetkish 127,8 paıyzǵa oryndalǵan. Esesine búdjetke 4 mıllıard 423,1 mıllıon teńge jospardan artyǵymen túsip otyr. Al, kórsetkishti ótken jyldyń esepti merzimimen salystyratyn bolsaq, ósim 116,4 paıyzdy quraǵan.

Dýlat Aıtbaı