Qazaqstan Respýblıkasynyń zańnamasyna sáıkes, 2019 jyldyń sáýir aıynan bastap 340 myńǵa jýyq kópbalaly analarǵa járdemaqy taǵaıyndalýy tıis bolǵan. Sol ýaqyttan beri, "beremiz dep turǵan úkimetten, alamyz" degen halyq kóp. Ataýly Áleýmettik Kómek alý máselesi týraly Qasym-Jomart Toqaev óz Tvıtter paraqshasynda eki aýyz sóz jazyp qaldyrdy dep habarlaıdy Qamshy.kz aqparat agenttigi.
Ár balaǵa 20789 teńge taǵaıyndaǵan úkimetten áleýmettik kómek alý úshin qarapaıym halyq ártúrli quıtyrqy áreketterge baryp jatyr. AÁK máselesi boıynsha bir ǵana Shymkent qalasy Eńbekshi aýdandyq sotynyń ózine ajyrasý týraly kúnine 10-15 aryz túsetini málim bolǵan. Áıeli joq ákege, kúıeýi joq anaǵa da bólinetin qarajatty eshkim de jiberip alǵysy kelmeıdi. Kerek deseńiz, balasynan bas tartyp jatqandar da kezdesedi.
Otbasynyń jalpy aılyq kiris kólemi 20789 teńgeden asatyn bolsa, AÁK qarastyrylmaıdy. Mysaly, 25 000 teńge jalaqy alatyn bolsańyz, demek ómir súrip, otbasyn asyraı alatyn jandardyń qatarynansyz. Otbasylyq kiristi qujat boıynsha azaıtý úshin, áıeli men kúıeýi ajyrasyp, zeınetaqysy bar anasyn nemese ákesin úı kitapshasynan shyǵaryp tastap jatyr. Halyq úkimettiń raqymynan aıyrylyp qalamyz ba dep, "Teńge beremin" dep tekseris kelse, taýyǵyn da tyǵyp qoıýǵa daıyn otyr.
Osy másele boıynsha Prezıdent Qasym-Jomart Toqaev:
"Ataýly Áleýmettik Kómek alý maqsatynda kópbalaly ata-analardyń ajyrasýy jıilep ketti. Úkimet pen prezıdent ákimshiligine alaıaqtyqqa tosqaýyl qoıý úshin sıfrlandyrý júıesin engizýdi jedeldetý tapsyryldy. AÁK – bul muqtaj azamattarǵa beriletin memlekettiń járdemaqysy", - dep jazdy óz paraqshasynda.
Prezıdenttiń jazbasyna Aıgerim atty jeli qoldanýshysy: "Kópbalalylar balasyn asyraýǵa aqsha tappaı ajyrasyp jatyr. Elimizdegi jemqorlar úlken somada aqsha jeıdi. Al kópbalalylardyń ajyrasýyn alaıaqtyq dep oılaısyz ba? Qatelesesiz", - dep pikir qaldyrǵan.
Demek, sıfrlandyrý engizilgen kúnge deıin, járdemaqyǵa muqtaj emes halyq alaıaqtyq jolmen aqsha alyp otyra bermek. Bir-birimen sol úshin ajyrasyp jatqan jastardyń oıyn buzǵan da osy – 21 myń teńge. «Qazannan qaqpaq ketse, ıtten uıat ketedi» - dep qazaq beker aıtpaǵan.
Ataýly Áleýmettik Kómek alý maqsatynda kópbalaly ata-analardyń ajyrasýy jıilep ketti. Úkimet pen Prezıdent Ákimshiligine alaıaqtyqqa tosqaýyl qoıý úshin sıfrlandyrý júıesin engizýdi jedeldetý tapsyryldy. AÁK – bul muqtaj azamattarǵa beriletin memlekettiń járdemaqysy.
— Qasym-Jomart Toqayev (@TokayevKZ) 30 maıa 2019 g.
Daıyndaǵandar: Bek Baıtas, Marjan Sábet
