Búgingi tańda Jambyl oblysynda 373 aýyldyq eldi mekenniń 199-y   ortalyqtandyrylǵan aýyz sýmen qamtylǵan. Al, 171 aýyl ortalyqtandyrylmaǵan sýmen qamtylyp, 3 aýyl tasymal sýmen qamtylǵan.

Sonymen qatar, Jambyl oblystyq energetıka jáne turǵyn úı-kommýnaldyq sharýashylyq basqarmasy aǵymdaǵy jyly  Taraz qalasynda 89,3, Qarataý qalasynda 100, Jańatas qalasynda 100 jáne Shý  qalasynda 60,0 paıyz halyq ortalyqtandyrylǵan sýmen qamtylǵanyn málimdedi. 

2021 jyly Taraz jáne Shý qalalarynyń  turǵyndaryn 100 paıyz  ortalyqtandyrylǵan aýyz sýmen qamtý josparlanǵan. Qala jáne aýdan basshylary qamtylmaǵan alqaptarǵa jobalar ázirlep, osy nátıjege qol jetkizý úshin jumystardy uıymdastyrýlary qajet. Qazirgi kezde saraptama qaraýyndaǵy Shý qalasynyń 7 myńnan astam halyq turatyn «Qosqudyq» alqabynyń sý berý júıeleri jobasyna oń qorytyndyny alý qajet eken. Onyń quny shammen 300,0 mıllıon teńgeni qurap otyr. Osy joba iske asyrylǵan jaǵdaıda Shý qalasy turǵyndarynyń 77 paıyzy ortalyqtandyrylǵan aýyz sýmen qamtylady. Ótken jyly aýdandardaǵy 19 nysannyń qurylysy  jáne 13 jobalyq-smetalyq qujattamanyń ázirlenýine búdjetten 8,6 mıllıard teńge bólindi. Onyń ishinde 8 nysan 2017 jyldan beri ótpeli bolyp esepteledi. Al, 17 nysannyń qurylysyna respýblıkalyq búdjetten 7,5 mıllıard teńge, 2 nysannyń qurylysyna jáne 13 jobalaý jumystaryna oblystyq búdjetten 1,1 mıllıard teńge bólingen.

Qazirgi tańda óńirde turǵyndardy aýyz sýmen qamtý qarqyn alýda. Máselen, Jambyl aýdanynyń Prıgorodnoe, Toǵyztaraý aýyldary, Qordaı aýdanynyń Aýqatty aýyly, Talas aýdanynyń Qyzyláýit aýyly, Baızaq aýdanynyń Keńes, Abaı, Myrzataı, Tegistik aýyldary, T.Rysqulov aýdanynyń Lýgovoe aýyly jáne Shý aýdanynyń D.Qonaev aýyldarynyń turǵyndaryna aýyzsý berilgen. Ortalyqtandyrylǵan aýyz sýmen qamtylǵan 199 aýyldyq eldi meken ishinde turǵyndar sany 362 myń 729 adam bolyp otyr. Bul oraıda óńirde aýyldardaǵy aýyz sý máselesi sheshimin taýyp keledi deýge tolyq  negiz bar. Aıtalyq, 2019 jylǵa respýblıkalyq búdjetten Taraz qalasynyń sýmen qamtý salasy  boıynsha 2 jobaǵa 650,0 mıllıon teńge, al aýyldyq eldi mekenderdi sýmen qamtýǵa 10 jobaǵa 3440,2 mıllıon teńge bólingen. Osy jobalarǵa oblystyq búdjetten qosymsha  qarjylandyrýǵa 10 paıyz kóleminde qarajat qarastyrylǵan. Jyl sońyna deıin Jambyl oblysynyń ákimi Asqar Myrzahmetovtiń tapsyrmasymen oblystaǵy 209 aýyldy  ortalyqtandyrylǵan sýmen qamtý kózdelýde.

Basqarmanyń málimetinshe, Qazaqstan Respýblıkasynyń Indýstrıa jáne ınfraqurylymdyq damý mınıstrligine 2019-2021 jyldary aýyldarǵa aýyz sý tartýdy qarjylandyrý maqsatynda Baızaq aýdany, Sarykemer aýylynyń sýmen qamtý júıeleri jobasy boıynsha quny 3,8 mıllıard teńge, Sarysý aýdanynyń Igilik jáne Óndiris aýyldaryna 705,9 mıllıon teńge, Talas aýdany Maıtóbe aýylyna 331,5 mıllıon teńge, Moıynqum aýylynyń Qylyshbaı aýyly 413,8 mıllıon teńge sýmen qamtý júıeleri qurylysy jobalaryna búdjettik ótinim tapsyrylyp, aǵymdaǵy jyly jumystardy bastaýǵa 4 aýylǵa 723,5 mıllıon teńge bólýge qoldaý tapqan.

Dýlat Aıtbaı