Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda Jambyl jerinde kópbalaly analarǵa páter kilti tabys etilýde. Ramazan aıyndaǵy rıasyz qýanyshqa kásipkerler keneltip, «Týǵan jerge tý tikken!» tulǵalardyń bolmysyn tanytýda. Mundaı ıgi bastamanyń jalǵasy retinde kúni keshe T.Rysqulov aýdanynyndaǵy mesenat ta kópbalaly otbasyǵa páter syılady.   

Kóregendilik kórsetken «Golden compass Jambyl» jaýapkershiligi shekteýli seriktestiginiń basshysy Qurban Izalov ujymdastarymen birge aýdandaǵy 7 balaly ana Ásel Qurmanovaǵa 5 bólmeli úı syılady. Baspananyń kiltin tapsyrý sátinde kásipker Qurban Izalov:

–Jańa qonys kópbalaly otbasyna qut bolyp, osy shańyraqtan elimizdiń ıgiligine qyzmet etetin perzentter ósip, ónsin! –dep tilektestigin bildirdi.

Lýgovoı aýylyndaǵy Beıbit Abýtalıpov kóshesinde ornalasqan  bul baspananyń 15 sotyq jer telimi, qora jaıy, monshasy, aýyzsý qubyry, baqshasy bar. 130 sharshy  metrdi quraıtyn úı tolyqtaı jańartylyp, aǵymdaǵy jóndeýden ótken. Abattandyrylyp, gazǵa qosylǵan.

–Kópten bergi tilegimiz búgin oryndalyp, qaıyrymdy jandardyń arqasynda oıymyzdaǵydaı baspanaǵa qol jetkizip, qýanyshqa kenelip jatyrmyz. El basqarǵan basshylarǵa, qaıyrymdy azamattarǵa aıtar alǵysym sheksiz. Analyq aq nıetimmen elimizdiń birligi ydyramaı, kemel bolashaqqa jetýdi tileımin, -dep Ásel Ertaıqyzy qýanyshyn jasyra almady.

Tórt ul, úsh qyz tárbıelep otyrǵan otbasyn aýdan ákimi E.Sadyrqulov pen  aýdandyq ardagerler keńesiniń tóraǵasy Q.Bıjanov  quttyqtap baryp, izgi tilekterin bildirdi.

Aıta keteıik, aýdannyń 42 eldi mekeninde 13370 otbasy bar. Onyń 3492-i   kópbalaly shańyraq.  Al, 1710 ana «Altyn alqa», «Kúmis alqa» ıegeri atanǵan.

Aýdan boıynsha baspana alý kezeginde  622 adam tursa, onyń 100-i kópbalaly analar. Ataýly áleýmettik kómek alýshy 1718 otbasy (11437 adam) bolsa, onyń 983-i kópbalaly januıa. Kópbalaly 552 otbasynyń 880 balasy mektepte tegin  ystyq tamaqpen qamtylyp, jaz maýsymynda 200 bala tegin demalys lagerine jiberiledi.

Aýdan basshysy bul – ana men balaǵa jasalǵan qamqorlyqtyń bir parasy ǵana ekenin, mundaı qoldaýlar men kómekke muqtaj otbasylarǵa  qamqorlyq áli de óz jalǵasa beretinin aıtty. El kelesheginiń kemeldiligi úshin jasalǵan mundaı qoldaýlar barlyq aımaqta arta berse deımiz.

Jaıdar Azamat