Jol salý, úıge «pol» salý emes. Búginde bul qurylys salasyna tikeleı baǵyttalǵan qaǵıdat. Alaıda keıingi jyldary qurylys baǵytynda baǵdaryn tappaı, tirligi turalaǵan tirlikter az emes. Bul jaıynda Jambyl oblysynyń  ákimi Asqar Myrzahmetovtiń tóraǵalyǵymen ótken jıynda jan-jaqty talqylanyp, máselesi maıshammen qaraldy.         

Basqosýda   oblys ákimdiginiń jolaýshylar kóligi jáne avtomobıl joldary basqarmasynyń basshysy Baqytjan Jánibekov baıandama jasady. Ol aldymen basqarma ákimshi bolyp tabylatyn 67 nysan boıynsha kelisim-sharttar jasasý jaǵdaıyna toqtalyp ótti. Onyń aıtýynsha, búginde 38 nysan boıynsha kelisim-sharttar jasalǵan. Al, 17 nysan boıynsha shaǵymdanýlar oryn alyp jatsa, 10 nysan boıynsha memlekettik satyp alý konkýrsy ótkizilýde. Sondaı-aq, 1 nysan boıynsha shaǵymdaný qorytyndysy shyqsa, taǵy 1 nysan boıynsha konkýrs jarıalanbaǵan.

Aıta ketý kerek, 67 nysannyń 48-i ortasha jóndeý, 13-i aǵymdaǵy jóndeý, 2-i qaıta jańǵyrtý, 4-i jańa jol qurylysyn júrgizý boıynsha belgilengen.

Oblys basshysy kelisim-shart jasalǵan nysandar boıynsha naqty taldaýlar, olar boıynsha júıeli jospardyń kerektigin basa aıtty. Taldaý men josparda olardyń oryndalý merzimi, merdiger kompanıalardyń áleýeti, tehnıkalyq múmkinshiligi sekildi jaǵdaılar tolyǵymen qamtylý jaıy sóz boldy. Bul boıynsha jaýapty tulǵalarǵa naqty tapsyrmalar júkteldi.

Sondaı-aq, jıyn barysynda salaǵa qatysty túsip jatqan aryz-shaǵymdar men synı matarıaldardyń mańyzdylyǵy saralandy. Aǵymdaǵy jyldyń  basynan beri barlyǵy 91 aryz-shaǵym kelip tússe, onyń  37-i basqarmaǵa tirkelgen. Qalǵany áleýmettik jelidegi jarıalanymdar. Aıta keterligi, 91 aryz-shaǵymnyń 66-y oblys ortalyǵy – Taraz qalasynyń kóshelerine qatysty bolyp otyr.

Asqar Isabekuly búginde Taraz qalasynyń negizgi kósheleri japa-tarmaǵaı qazyndylarǵa aınalǵanyn tilge tıek etip, ol óz kezeginde áleýmettik jeli qoldanýshylardyń da narazylyǵyn týdyryp otyrǵanyn basa aıtty. Óńir basshysy jer asty qubyrlaryn jóndeý, aýystyrý jumystary tıanaqty ári ret-retimen júrgizilý kerektigin eskertip, shahar kóshelerindegi beı-bereketsizdikti qalpyna keltirý boıynsha qala ákimine naqty tapsyrmalar berdi. Sonymen qatar, qaladaǵy ózge de máselelerdi retteý boıynsha tıisti jumystardy jolǵa qoıý kerektigin júktedi. Bul boıynsha oblys ákimi  tıisti orynbasary, qala ákimi jáne sala basshylarynan arnaıy jumysshy tobyn quryp, naqty is-sharalar josparyn bekitýdi mindettedi.

Árıne, basqarmadaǵylar men basqa arnadaǵylar synnan sabaq alyp jatsa maqul-aq. Alaıda búgingi kúnge josyqsyz merdigerler men senimsiz seriktestikter kóbeıgeni jasyryn  emes. Aımaq basshysynyń tapsyrmalarynan keıin olqylyqtardyń orny tolady dep seneıik.   

Jaıdar Azamat