Shymkentte múgedek balalar sheneýnikterdiń sheshimi saldarynan arnaıy orta bilim alý múmkindiginen aıyrylýy múmkin dep habarlaıdy Qamshy.kz aqparat agenttigi KTK telearnasyna silteme jasap. "Túrkistan oblystyq bilim basqarmasyndaǵylar qulaǵy nashar estıtin balalarǵa arnalǵan ınternat túlekteri atynan aryz jazyp, múgedekterge arnalmaǵan kádimgi kolejge grant bólip jibergen" deıdi ata-analar.

Osyǵan narazy arnaıy mektep-ınternattyń túlekteri men ata-analar jınalyp, bilim grantyn ınklúzıvti kabınetteri bar kolejge bólýin talap etti. Mylqaý, qulaǵy estimeıtin bul balalar bıyl ǵana Leńgirdegi arnaıy mektep-ınternatty támámdap, oqýyn Shymkenttegi №5 - kolejde jalǵastyrýy tıis edi. Ata-analar ol úshin byltyrdan beri kolejdiń ózi men oblystyq bilim basqarmasyna birneshe aryz jazǵan. Biraq mamyr aıynyń aıaǵynda grant Túrkistandaǵy múgedekterge jaǵdaı jasalmaǵan ózge oqý ornyna bólingenin bir-aq bilipti.

"Mamandar joq. 5 kolejge balalar barady dep jazǵan sebebimiz, №5 kolejde sýrdolog, logoped  defektolog bar", - dedi Shymkent qalasynyń turǵyny Janar Smanova.

Ata-analar ózderiniń atynan aryz jazylyp, granttyń basqa jaqqa bólingenin bile sala, Túrkistan oblystyq bilim basqarmasyna barǵan. Alaıda pedagog-sheneýnikter «grant unamasa, balalaryńdy aqyly túrde oqytyńdar» dep shyǵaryp saldy" deıdi. Al bólim basshysy Rahıa Asanova tiginshilikke 21 grant bólingenin aıtady. Biraq múgedek balalar men ata-analary oǵan muryn shúıire qarap otyrǵan kórinedi.

"Bazasy óte jaqsy. №5-kolledjden eshqandaı kemdigi joq. Jumys júrip jatyr. "Túrkistanǵa kelmeımiz, shirip ketken" deıdi. Ákimnen bastap osy jerde turyp jatyrmyz", - dep málimdedeme jasady Túrkistan oblystyq bilim basqarmasynyń bólim basshysy Rahıa Asanova.

"Ata-analardyń aryzyn eskermeýin oblys sheneýnikteriniń nemquraıdylyǵy" degen shymkenttik bilim basqarmasyndaǵylar, endi bólinip qoıǵan grantty qaıta jasaqtaý kerektigin aıtady. Ákimdik aldyna jınalǵandardy «balalar qyrkúıekte qalaǵan oqý ordasyna barady» dep sendirdi.

"Bul endi kishkene ýaqyt alady. Degenmen, qyrkúıekte balalardyń barlyǵy óziniń tańdaǵan №5-kolledjinde grant negizinde bilim alady. Jalpy bas-aıaǵy 50 balany grantpen qamtýǵa jaǵdaı jasaımyz", - dedi Shymkent qalalyq bilim basqarmasy basshysynyń mindetin atqarýshy Aıgúl Tekebaeva hanym.

Estý qabileti nashar, sóıleı almaıtyn balalar men ata-analar bul joly da sheneýnikterdiń ýádesine senip tarqasty. Endi ýaǵda boıynsha olar Túrkistanda emes, Shymkentte oqýy tıis. Ata-analar ótinishin nazarǵa almaı, "ózimbilemdikke" salynǵan oblystyq bilim basqarmasy da jumyssyz qalmaıdy. Endi olardyń aldynda múgedekter bas tartqan 21 granttyń aqshasyn búdjetke keri qaıtarý máselesi tur.