Saılaý kúni qarsańynda Qazaqstannyń barlyq aýmaǵynda qaýipsizdik sharalary kúsheıtilmek. Bul týraly  ishki ister mınıstri Erlan Turǵymbaev habarlady dep jazady Qamshy.kz aqparat agenttigi.

Mınıstr qazir búkil eldiń aýmaǵynda "Quqyq tártibi" atty operasıa júrgizilip jatqanyn aıtty. 

"Nur-Sultanda ǵana emes, búkil el boıynsha qaýipsizdik sharasy retinde 6 maýsymǵa deıin "Quqyqtyq tártip" operasıasy júrgiziledi. Sosyn 7 maýsymda búkil polısıa kúsheıtilgen jumys tártibine kóshedi, óıtkeni elde saılaý ótedi", – dedi ol.

Esterińizge sala ketsek, 8 maýsym tynyshtyq kúni, sondyqtan úgit-nasıhatqa tyıym salynǵan. 

"Bul bireýden qorǵaný úshin emes, qoǵamdyq qaýipsizdikti qamtamasyz etý úshin qajet. 8-i tynyshtyq kúni, úgit-nasıhat jumystaryna tyıym salynady, 9-y saılaý, barlyq jerlerde polısıa patrúlderi jumys isteıdi. 21 myńnan astam polıseı jumysqa shyǵady", – dep atap ótti Turǵymbaev.

"9 maýsymda saılaý, ol óte erte bastalady. Qaýipsizdikti qamtamasyz etý úshin bizdiń patrúlderdiń barlyǵy jumys isteıdi. Bul saılaý kezinde ótkiziletin qalypty sharalar", - dep sendirdi mınıstr.