Taldyqorǵanda  2-qabattan qulap, komaǵa túsken búldirshin saýyqty dep habarlaıdy Qamshy.kz aqparat agenttigi Eýrazıa birinshi arnasyna silteme jasap. 

Eki apta boıy ómir úshin arpalysqan dárigerlerdiń arqasynda 2 jastaǵy qyz bala saýyǵyp, aýrýhanadan shyǵaryldy. Dárigerler densaýlyǵynyń jaqsarǵanyn, ata-anasyn tanıtynyn aıtady. Al, kishkentaı qyzdy terezege shyǵaryp qoıyp, osyndaı jaǵdaıǵa jetkizgen tárbıeshige jaza taǵaıyndaldy ma? 
 
Arýna Qýanyshqyzy 15 mamyrda №19 mektep-gımnazıasyna qarasty shaǵyn ortalyqtyń 2- qabatynan qulap ketken. Onyń balabaqshaǵa baryp júrgenine nebári 2-aq kún bolǵan eken. Al, atalǵan ortalyq ashylǵaly jumys istep kele jatqan tárbıeshi dál sol kúni 2 birdeı búldirshindi ashyq turǵan terezege turǵyzyp qoıǵan. Zardap shekken buldirshin qazir ata-anasynyń jyly qushaǵynda. Dárigerler "ómir men ólim arasynda arpalysqan qyzdyń qazirgi jaǵdaıy jaqsy" deıdi.

Degenmen, áli de aq halattylardyń baqylaýynda bolady eken. 

"Bala sóıleıdi, áke-sheshesin tanıdy, tamaq ishedi, úlken dáreti jaqsy. Eshkim ustamaı ózi júredi. Biraq, bári bitti dep aıtýǵa bolmaıdy. 2-3 aıda kelip qaralyp turady. 6 aıdan keıin basyna taǵy da kompúter tomografıasyn jasap kóremiz", - deıdi kópsalaly oblystyq balalar aýrýhanasynyń dırektory Marat Dosqalaıev.

Tárbıeshiniń salǵyrttyǵynan qıyn jaǵdaıǵa tap bolǵan sábıdiń ata-anasy mektepte muǵalim eken. Ákesi dene shynyqtyrý pánininiń, al anasy - bastaýysh synyp oqytýshysy. Bolǵan jaıtqa qatysty ázirge suqbat berýge daıyn emespiz dep otyr. Al, oqıǵa bolǵan balabaqshada 2 apta buryn qyzylsha aýrýynyń aldyn alý maqsatynda karantın jarıalanypty. Jumys istep turǵan ortalyqqa eshkimdi kirgizbeıdi.

10 jyl boıy bala qarap, olqylyqqa jol bergen tárbıeshige qatysty tergeý amaly bastalyp ketken eken. Qazir iske qatysty tıisti saraptamalar taǵaıyndalǵan.

"Osy derekke qatysty QR Qylmystyq kodeksiniń 141-babyna sáıkes, qylmystyq is qozǵaldy. Búldirshin aýrýhanadan shyqty. Osyǵan oraı barlyq medısınalyq qujattar talap etildi. Osy qujattar negizinde sot-medısınalyq saraptama taǵaıyndaldy" - dedi Almaty oblystyq polısıa departamentiniń resmı ókili Serik Úpıev.

Polıseılerdiń sózinshe, prosestik sheshim shyqqan soń ǵana tárbıeshige qatysty naqty jaza taǵaıyndalýy múmkin. Qazir ol jumystan shettetilgen.