2019 jyldyń 1 maýsymynda saǵat 12.00-de «Barys Arena» sport saraıynda (Turan dańǵyly, 75/1) XIV Halyqaralyq «Juldyzaı» balalar shyǵarmashylyǵy festıvaliniń gala-konserti ótti dep habarlaıdy Qamshy.kz aqparat agenttigi BI Juldyzai qorynyń baspasóz qyzmetiniń aqparatyn negizge ala otyryp.
Festıvál 10 aqpanda bastalyp, elimizdiń barlyq óńirlerin qamtydy. Bıylǵy jyly shyǵarmashylyq baıqaýǵa qatysýǵa 7750 ótinim tústi. Ekinshi halyqaralyq kezeń - 26-31 mamyr aralyǵynda Nur-Cultan qalasynda ótti. Oǵan 255 bala qatysyp, eń jarqyn nómirler gala-konsert baǵdarlamasyna engizildi.
Baıqaýǵa qoldaý bildirgen estrada juldyzdary Dáýlet Bolatov, Baljan Bıdash, Aısha, Nazym Ábildına jáne «Golos. Detı» jobasynyń jeńimpazy Maksım Erjan qatysýshylarmen birge sahnada óner kórsetti.
Festıvaldiń erekshe áser qaldyrǵan sátteriniń biri, qos zaǵıp balanyń shyrqaǵan áni. Olar – Shymkent qalasynan 9-jastaǵy Aıbyn Jumabekov jáne Almaty qalasynan 11-jastaǵy Nadır Muhammed esimdi jigitter. Kózi kórmese de, kókiregi oıaý balalardyń "Elester" áni halyqtyń júregine birden jol tapty. Bul týraly BI Group ınvestısıalyq jáne qurylys holdıńiniń aksıoneri jáne dırektorlar keńesiniń tóraǵasy Aıdyn Rahymbaev óz áleýmettik jelisinde jazǵan bolatyn.
«Osy óleńdi tyńdap, árbir sózin uǵynyp, kóz jasymdy toqtata almadym. Myńdap jınalǵan kórermender de kózine jas aldy. Osyndaı óleńdi tańdap, oryndaǵan Shymkent pen Almatynyń 9 jáne 12 jasar balalaryn kórgende, emosıasyz qalý múmkin emes...»,- delingen jazbada.
Balalardyń talantyn baıqaǵan jeli qoldanýshylary olarǵa tánti bolyp, jarysa jaqsy tilekter jazýda.
«Juldyzaı» festıvali Bilim jáne ǵylym mınıstrliginiń qoldaýymen 2005 jyldan beri ótkizilip keledi. Qazaqstannyń túkpir-túkpirinen erekshe balalardy biriktiretin baıqaýdyń tanymaldyǵy jyl saıyn ósýde. Máselen, eger birinshi jyly oǵan 76 bala qatyssa, bıyl 7 750 bala qatysýǵa nıet bildirdi. Osy jyly jınaqtalǵan tájirıbe men ınklúzıvti jobaǵa degen qyzyǵýshylyqty eskere otyryp, Qor ony halyqaralyq deńgeıge shyǵardy. Qatysýǵa ótinim bergen elder arasynda ‒ Grýzıa, Belarýssıa, Túrkıa, Reseı jáne Fransıa bar. Jańartylǵan festıvál erekshe qajettilikteri bar daryndy balalarǵa arnalǵan «tramplın» bolady, olardyń shyǵarmashylyq daǵdylaryn shyńdaýǵa jáne ónerin halyqaralyq alańda kórsetýge múmkindik beredi.
«BI-Juldyzaı» korporatıvtik qaıyrymdylyq qory komersıalyq emes uıym bola otyryp, shyǵarmashylyq, óner jáne sport arqyly erekshe qajettilikteri bar balalardy áleýmettik beıimdeý jáne yqpaldastyrý maqsatynda 14 jyl boıy balalar shyǵarmashylyǵynyń respýblıkalyq festıvali men «Juldyzaı» spartakıadasyn ótkizedi.
Qazaqstan Respýblıkasynyń Prezıdenti Qasym-Jomart Toqaev XIV halyqaralyq balalar shyǵarmashylyǵyna arnalǵan «Juldyzaı» festıvaliniń gala-konsertine qatysty. Halyqaralyq balalardy qorǵaý kúninde merekelik sahnada Qazaqstannyń túkpir-túkpiri men shetelderden kelgen 255 erekshe nazardy qajet etetin daryndy bala óner kórsetti. Jeti myńnan astam kórermen balalardyń ónerine tamsana kýá boldy. Jas talanttar «Barys-Arena» sport kesheniniń sahnalyq alańyn esten ketpes erekshe atmosferaǵa bólep, jınalǵan qaýymǵa merekelik kóterińki kóńil-kúı syılady. Olar ózderiniń sheksiz shyǵarmashylyq múmkindikterin, erik-jigerin, ór rýhy men erteńge degen senimderin pash etti. «Juldyzaı» festıvali barlyq talantty jáne óz maqsattaryna senimdi, armanǵa qanat qaqqan balalardy úlken bir otbasyna jınady. Olardyń osyndaı úlken komandaǵa jınalýyna kúsh salyp, atalmysh shyǵarmashylyq festıváldiń ótýine tikeleı jetekshilik etken qaıyrymdylyq qorynyń eńbegi. Qatysýshylar talant pen armanǵa degen qulshynys bar kezde eshqandaı múmkindikke shekteý qoıylmaıtynyn bıylǵy jyly taǵy bir márte dáleldedi.
Daıyndaǵan: Bek Baıtas
Pikir qaldyrý