"Adyrna" ulttyq-etnografıalyq birlestigi "Azamattyq bastamalardy qoldaý ortalyǵy" KEAQ-nyń (@CISC ) memlekettik granty aıasynda QR Aqparat jáne qoǵamdyq damý mınıstrliginiń qoldaýymen júzege asyrylý ústindegi "Dástúrli rýxanı qundylyqtardy qoldaý jónindegi jumystardy uıymdastyrý" jobasy boıynsha "Tarıhtan taǵylym: ulttyq ıdeıa jáne din máseleleri" atty respýblıkalyq ǵylymı-tájirıbelik konferensıany uıymdastyrdy dep habarlaıdy Qamshy.kz aqparat agenttigi. 

Atalǵan shara «Tarıhtan taǵylym: ulttyq ıdeıa jáne din máseleleri» taqyrybynyń aıasynda keń aýqymdy qamtydy.
Stýdent jastar men konferensıaǵa arnaıy kelgen qonaqtardyń aldynda alǵashqy sóz kezegi aqyn, etnograf Ábýbákir Qaıranǵa berildi. Ábýbákir aǵa qazaq balasynyń basty maqsaty- ulttyq sanany jańǵyrtý ekendigin aıta kele, «Túbimizdi zerttep, tarıhymyzdy tanýǵa endi ǵana bilek sybana kirisip jatqanymyz ókinishti-aq. Dese de, eshten kesh jaqsy», – degen oıyn bildirdi.

Fılosofıa ǵylymdarynyń doktory Baqytjan Satershınov, fılologıa ǵylymdarynyń kandıdaty Rashıd Mýhıtdınov, etnograf, mádenıettanýshy Berdaly Ospan, dintaný ǵylymynyń magıstri Elnar Berikbaev syndy azamattar túrli taqyrypta baıandamalar oqyp, tyńdarmandarǵa din men dástúr, ulttyq múdde uǵymynyń mán-mańyzyn aıqyn ashyp kórsetti. Sharaǵa qatysýshy jastardy jalyndy jyrymen sýsyndatyp, astarly pikir bildirgen aqyn Amanǵazy Káripjan myrza dinı, hám rýhanı saýatty bolýǵa shaqyryp, «Neǵurlym túsiniksiz dúnıe soǵurlym ózine tabyndyrady»,-dep qorytyndylady.

Aty atalǵan azamattarymyzdan bólek, tanymdyq keshtiń kórkin qyzdyra túsken dástúrli ánshiler qobyz, dombyra aspaptarynda halyq ánderin oryndap, tyńdarmandaryn tánti etti.

Ǵylymı-tájirıbelik konferensıanyń sońy qatysýshylar arasyndaǵy pikir almasýǵa ulasyp, «Uly dalanyń jeti qyry» kitap kórmesin tamashalaýmen óz jalǵasyn tapty.

"Adyrna" ulttyq-etnografıalyq birlestiginiń prezıdenti Arman Áýbákir konferensıa sońynda atalmysh sharalardyń jyl sońyna deıin jalǵasatynyn atap ótti.