Memleket basshysy máslıhat depýtattarymen, qoǵamdyq keńes múshelerimen, zıalyq qaýym, ardagerler, kásipodaqtar men jastar uıymdarynyń ókilderimen, memlekettik qyzmetshilermen kezdesti.

– Atyraý oblysy – mádenı jáne adam áleýeti mol aımaq. Óńirdiń jetistikteri jergilikti halyqtyń ómir súrý sapasy men tabysynyń ósýine yqpal etýi tıis. Ákimdik, úkimet, bıznes – bárimiz osyǵan basa nazar aýdarýymyz kerek, – dedi Qazaqstan Prezıdenti.

Memleket basshysy óńir halqynyń ál-aýqatyn arttyrýdy qamtamasyz etýge, otandyq óndirýshilerdi damytý úshin munaı-gaz sektorynyń áleýetin barynsha paıdalanýǵa kóńil bóldi. Qasym-Jomart Toqaev Úkimetke úsh iri joba aıasynda ónimderdi satyp alý jáne qyzmet kórsetý isindegi otandyq taýarlar men jergilikti mamandardyń úlesin kóbeıtý, sheteldik jáne otandyq jumysshylardy birdeı eńbekaqymen qamtamasyz etý jóninde júıeli jumys júrgizýge tapsyrma berdi.

– Azamattarymyz sapaly bilim alyp, jalaqysy joǵary jumysqa ornalasýy úshin barlyq jaǵdaıdy jasaýymyz kerek. Otandyq kásipkerlerge de aıtarym bar. Memlekettiń jáne kez-kelgen kompanıanyń eń basty baılyǵy adam ekenin umytpańyzdar. Bastysy – jańa jumys oryndaryn ashý, jumysshylardyń jalaqysyn arttyrý, – dedi Qasym-Jomart Toqaev.

Qazaqstan Prezıdenti ekonomıka salasyn ártaraptandyrý, sonyń ishinde polıetılen, polıpropılen óndirý jáne balyq sharýashylyǵyn damytý jónindegi jobalardy júzege asyrý máselelerine toqtaldy.

– Jergilikti ekonomıkanyń munaı-gaz jáne munaı-hımıa keshenderinen basqa da salalaryn damytý qajet. Óńirdiń balyq ónerkásibin qalpyna keltirý jáne osy sektorǵa ınvestorlar tartý kerek. Qabyldanǵan sharalardyń nátıje bermeı jatqanyn kórip otyrmyz. Bizdiń azamattar naqty ister kútedi. Aýyl sharýashylyǵy mınıstrligi jáne ákimdik bul máselege basa nazar aýdarýy kerek, – dedi Memleket basshysy.

Qasym-Jomart Toqaev turǵyn úı, ekologıa jáne kólik ınfraqurylymy máselelerin sheshýge erekshe toqtaldy.

– Naǵyz sapaly jol qandaı bolýy kerek? Eń aldymen, sol joldy paıdalanatyn turǵyndardy dittegen jerine jyldam jetkizetin qaýipsiz jol bolýy tıis. Jóndelgen joldyń sany emes, sapasy mańyzdy! Ákimdikterdiń jumysyn osy talapqa saı baǵalaıtyn bolamyn. Mysaly, qazir Inder men Mıalynyń arasyndaǵy 120 shaqyrymdy júrip ótý úshin 5 saǵat kerek. Al jóndeýden keıin bul aralyqty 1,5 – 2 saǵattyń ishinde júrip ótýge bolady, – dedi Qazaqstan Prezıdenti.

Memleket basshysy el búdjetin josparlaý kezinde transferlerdiń ádil bólinýi men jemqorlyqqa qarsy jumystardy kúsheıtý týraly da aıtty.

Kezdesý sońynda Qazaqstan Prezıdenti qatysýshylardy Qazaqstan Respýblıkasynyń memlekettik rámizderi kúnimen jáne qasıetti Ramazan aıynyń aıaqtalýymen quttyqtap, tabys pen baq-bereke tiledi.

Memleket basshysy atqarǵan minsiz eńbekteri úshin birqatar azamatty alǵys hatpen marapattady. Olardyń arasynda Atyraý oblystyq aýrýhanasynyń hırýrgıalyq bólimniń meńgerýshisi A.Dúsipov, «Bolashaq K» qoǵamdyq birlestiginiń menedjeri G.Jumabaeva, munaı jáne gaz óńdeý sehynyń operatory N.Erǵalıev, «Amangeldi atyndaǵy» balyq sharýashylyǵy óndiristik kooperatıviniń jetekshisi Ý.Esalıev jáne Atyraý qalalyq №17 orta mektep lıseıiniń matematıka pániniń oqytýshysy S.Eroshenko bar.