Jańagúl Asanqyzy 1965 jyly qarashada İle Qazaq avtonomıaly oblysynyń Nylqy aýdanynda dúnıege kelgen, dáriger, synyqshy.

Eńbek jolyn QHR İle oblystyq Dostyq emhanasynda dáriger bolyp bastaǵan. Búginde İle Qazaq avtonomıaly oblystyq qytaısha, qazaqsha emdeý emhanasynyń súıek aýrýlar bóliminiń meńgerýshisi, «Qytaı mádenıetin zertteý qoǵamy dástúrdi emdeý uıymynyń» múshesi, «Dúnıejúzi emdeý qoǵamynyń» turaqty múshesi, «Dúnıejúzilik súıek aýrýlaryn qytaısha emdeý birlestiginiń» atqarýshy dırektory.

1995 jyly Pekındegi «Doń Myn» emhanasynda synǵan súıekke operasıa jasaý, 1999 jyly Shyńjań medısına ýnıversıtetinde synǵan súıekterdi tańý, salý boıynsha bilimin jetildirgen.

1995 jyly AQSH-tyń San-Fransısko qalasynda ótken dúnıejúzilik dástúrli emdeý ǵylymı jınalysynda «Ýaqyty ótken ıyq shyǵýdy qazaqy emdeý» atty baıandamasy «Altyn saýyt» syılyǵyn alǵan, osy maqalasymen «Halyqaralyq ulttyq shıpagerlik sholpany» degen ataqqa ıe bolady.

1997 jyly QHR memlekettik «1 mamyr eńbek» ordenin, 2000 jyly memlekettik «Ǵasyr attaǵan shıpager» ataǵyn alǵan, 2002 jyly «Jalǵaǵysh talqany arqyly synyq emdeýden 98 klınıkalyq mysal» atty eńbegi Gonkongta ótken dúnıejúzilik súıek aýrýlaryn emdeý ǵylymı talqy jınalysynda halyqaralyq 2-dárejeli medalmen marapattalǵan, 2005 jyly QHR-dyń Memleket basshysy Hý Jın Taýdyń qabyldaýynda boldy.

Jańagúl Asanqyzy «Synyqtyń syrtynan jaǵylatyn dári jáne ony daıarlaý ádisin» taýyp, patenttiń ıegeri atandy. Bul dári súıektiń bitýin tezdetip, daýalaný ýaqytyn qysqartady.