12-maýsym kúni oblys ákiminiń orynbasary, oblystyq shtab tóraǵasy Álibek Náýtıevtiń tóraǵalyǵymen, Atyraý oblystyq aýmaqtyq ınspeksıasy uıymdastyrǵan, Qurmanǵazy aýdanyna qarasty Maqash aýyldyq okrýginde dalalyq shtab otyrysy ótti dep habarlaıdy Qamshy.kz aqparat agenttigi Atyraý oblysynyń Óńirlik komýnıkasıalar qyzmetine silteme jasaı otyryp. 

Shtab otyrysyndaǵy qaralǵan basty másele, shegirtke tektes zıankesterge qarsy turý. Iaǵnı, úıirli shegirtkeniń beleń alyp ketpeýin qadaǵalaý. Osy oraıda úıirli shegirtkemen kúresý úshin hımıalyq óńdeý jumystary júrgizilip keledi.

"Bıyl sýdyń az kelýine baılanysty, shegirtke tektes zıankesterdiń shyǵatyn aýmaǵy ulǵaıý qaýpi bar. Sol sebepti búgingi shtab otyrysynda, osy máseleniń aldyn alý maqsatynda barlyǵymyz jınalyp otyrmyz. Óńirimizdegi mal sharýashylyǵy men egin sharýashylyǵyna zıan kelmeý úshin,birlesip jumys atqarýymyz kerek"- deıdi Atyraý oblysy ákiminiń orynbasary Álibek Náýtıev.
Atyraý oblysynda úıirli shegirtkeniń azıattyq shegirtke jáne ıtalándyq prýs dep atalatyn eki túri kezdesedi. Azıat shegirtkesi kóltabandar men qamysty alqaptarda meken etetin bolsa, ıtalán prýsy mal jaıylatyn jaıylymdarda mekendeıdi.

"Jylda bizdiń ınspeksıa óz jumysyn atqaryp keledi. Bıyl respýblıkalyq búdjetten oblys boıynsha, úıirli shegirtkelerge qarsy 8640 gektar jerge hımıalyq óńdeý jumystary júrgizilmek. Jer ústi tásilimen júrgizilse, qolaısyz kólik bara almaıtyn jerlerge jeńil deltalet arqyly áýe tásilimen óńdeledi. Sondaı-aq, jergilikti búdjetten saıaq shegirtkege qarsy 3540 gektarǵa hımıalyq óńdeý jumysy júrgiziletin bolad",- deıdi QR ASHM AÓK MIK-niń Atyraý oblystyq aýmaqtyq ınspeksıa basshysy Abat Janǵalıev.
Shtab otyrysyna «Rosselhozsentr» FMBM Astrahan oblysy fılıalynyń basshysy Vıktor Shláhov qatysyp, birlesip jumys jasaýdyń mańyzdylyǵyna toqtaldy. 

"Astrahan oblysy men Atyraý oblysy shekaralas ornalasqannan keıin,birlesip jumys atqarýymyz mańyzdy. Sebebi, úıirli shegirtke bir orynnan ekinshi orynǵa ushyp-qonyp júredi. 2017 jyly Dagestan aımaǵy jaǵynan marakandyq úıirli shegirtke ushyp kelip, soǵan qarsy turǵan bolatynbyz. Ol shegirtkemen kúresý qıyn. Sol sebepti, bıylǵy jyly da sol úıirli shegirtkeniń kúsh alyp ketýin toqtatý maqsatynda, Astrahan oblysynda birqatar jumystar atqarylyp jatyr",- deıdi Vıktor Shláhov.

Jıyn sońynda oblystyq aýmaqtyq ınspeksıasy úıirli shegirtkege qarsy turý úshin oblys kólemine búrikkish tehnıkalar qajet ekenin usynys retinde aıtyp, hattamaǵa engizdi.