Azattyq radıosynyń tilshisi Asylhan Mamashulynyń «Qarıa men teńiz» fılmi Qazaqstan jýrnalıser odaǵynyń júldesine ıe boldy dep jazady Qamshy.kz aqparat agenttigi QazTAG-tyń deregin negizge alyp.

QazTAG-tyń jazýynsha, Asylhan Mamashulyna «Saıası sholý» nomınasıasy boıynsha júlde «Aral teńiziniń qalypqa kelerine senetin avtorlyq pozısıasy úshin» berilgen.

Odaq júldesi 10 jýrnalıske berilgen. «Tilshi qyzmeti» nomınasıasy boıynsha júlde - Informburo.kz jýrnalısi Evgenıa Bodrovaǵa, «Ekonomıkalyq sholý» nomınasıasy - «Egemen Qazaqstan» gazetiniń Mańǵystaý oblysy boıynsha tilshisi Gúlaıym Shyntemirqyzyna, «İzdenis materıaly» júldesi – «Aq Jaıyq» tilshisi Farhat Ábilovke, «Televızıalyq jumys» nomınasıasy – «Alaý» telearnasynyń jýrnalısi Tatána Morozǵa, «Jýrnalısik zertteý» júldesi «Spýtnık-Qazaqstan» tilshisi Aleksandr Mıroglovǵa berilgen.

Budan bólek, «Zertteý eńbegi» júldesin - «Qazaq úni» gazeti bas redaktorynyń orynbasary Zeınolla Abajan, «Ǵylymı-tanymdyq eńbek» nomınasıasyn - «Kýrsıv» tilshisi Irına Osıpova, «Fotoeńbek» syılyǵyn – «Qostanaı jańalyqtary» gazetiniń fototilshisi Konstantın Vıshnıchenko, «Internet-joba» júldesin Vlast.kz ınternet-jýrnalynyń bas dırektory Vácheslav Abramov alǵan.

Jýrnalıser odaǵy men «Aq Jaıyq» gazetiniń Ábdildá Muqashev atyndaǵy birlesken júldesi «Ýralskaıa nedelá» gazetiniń bas redaktory Luqpan Ahmedıarovke berilgen. Qazaqstan qorǵanys mınıstrligi baspasóz qyzmetiniń fototilshisi Dýman Qurmanǵalıev fototilshi Rahymbaı Hanáli atyndaǵy arnaýly syılyqty alǵan.

Jýrnalıserdi marapattaý rásimi 26 maýsym kúni 11.00-de «Eýrazıa» saýda ortalyǵynyń baspasóz zalynda ótedi.