23 maýsym kúni qazaqstandyq polıseıler óz kásibı merekelerin atap ótedi. Atyraý oblysynyń ákimi men polısıa departamentiniń basshysy oblysymyzdyń polıseılerin merekelerimen quttyqtady.
2007 jyly Memleket basshysynyń jarlyǵymen 23 maýsym kúni polısıa kúni dep resmı túrde bekitildi.
Oblys ákimi Nurlan Noǵaev polısıa departamentiniń qyzmetkerlerin merekemen quttyqtap, atqaryp jatyrǵan jumystaryna rızashylyǵyn bildirdi. Polısıa salasynda qyzmet etý óte qaýipti jáne qıyn. Biraq barlyq aýyrtpalyqtarǵa qaramastan, tártip saqshylary qoǵamdaǵy zańdylyqty saqtaý úshin qyzmet etýde.
-Qoǵamdyq tártip pen azamattardyń qaýipsizdigin qamtamasyz etý úshin sizderge úlken jaýapkershilik júkteledi. Sizderdi adal qyzmetterińiz ben tańdaǵan mamandyǵyńyzǵa adaldyq tanytqandaryńyz úshin shyn júrekten alǵysymdy bildiremin.
İshki ister organdarynda eńbek etken ardagerlerge alǵys aıtamyz. Ardagerler búgin de izbasarlary - jas urpaqqa úlgi bola alady. Bul kisiler óz isterin joǵary deńgeıde atqarǵan naǵyz mamandar,- dedi Nurlan Noǵaev.
Oblys basshysy polısıanyń áleýeti óte joǵary ekendigin, oblystyq bıliktiń kómegimen materıaldyq-tehnıkalyq bazanyń deńgeıi edáýir kóterilgenin atap ótti. Quqyq qorǵaý organdardyń qyzmetkerlerin turǵyn úımen qamtamasyz etý máseleleri de sheshilýde.
- Qoǵam men memlekettiń múddesin qorǵaý bizdiń quqyq qorǵaý organdarynyń mindetteriniń biri. Memleket osy mindetterdi júzege asyrý úshin barlyq jaǵdaılardy jasaýda. Jol qaýipsizdigin saqtaý úshin, qadaǵalaý kameralaryn ornatýǵa jetkilikti túrde qarajattar bólinýde. Zańsyz balyq ónimderin satýmen aınalasatyndarmen kúres júrgizildi. Aldaǵy ýaqytta da bizdiń polısıamyzdyń abyroıy joǵary deńgeıde bolatynyna senimdimin. Keıde mindetin atqarý úshin polısıa qyzmetkerleri basyn qaterge tigedi. Óz ómiri men densaýlyǵyna qaýip tónsede, polısıa halyqtyń densaýlyǵy men ómiriniń tynyshtyǵy úshin jumys jasaıdy. Bizdiń oblysymyzda buǵan dálelder kóp,- dedi Nurlan Noǵaev.
Oblystyq polısıa departamentiniń basshysy Hamza Úmbetqalıev áriptesteri men qyzmetkerlerdi merekemen quttyqtaı otyryp, polısıa qyzmetkerleriniń óz mindetterin aldaǵy ýaqytta da abyroımen atqara beretinine senim bildirdi.
Merekege oraı, Qazaqstan Respýblıkasy İshki ister mınıstriniń buıryǵymen polısıa qyzmetkerlerine áskerı shender berildi. Birqatar qyzmetkerler adal qyzmeti úshin maqtaý qaǵazdarymen jáne alǵys hattarmen marapattaldy.