Arystaǵy tótenshe jaǵdaıǵa baılanysty qala aýmaǵynda dezınfeksıa jumystaryn júrgizý maqsatynda Jambyl jáne Qyzylorda oblystarynan arnaıy mamandar toby keldi dep habarlaıdy Qamshy.kz aqparat agenttigi Túrkistan oblystyq Óńirlik komýnıkasıalar qyzmetine silteme jasap.

"Jambyl oblysynan taýarlar men kórsetiletin qyzmetter sapasyn baqylaý departamentinen jáne ózge de zalalsyzdandyrý ortalyqtarynan jalpy sany 30-ǵa jýyq maman keldi. Al Qyzylorda oblysynan ulttyq saraptama ortalyǵynyń osy óńirdegi fılıalynan 17 maman kelse,  ózge de osy salaǵa jaýapty mamandar zalalsyzdandyrý jumystaryn bastap ketti. Bul brıgadalardyń bári tehnıkamen, qajetti qural-jabdyqpen, qamtylǵan", - dep habarlady Óńirlik komýnıkasıalar qyzmetindegiler.

Eske salaıyq, 24 maýsymda saǵat 9.20-da Arys mańyndaǵy áskerı bólim terıtorıasynda ornalasqan qarý-jaraq qoımasynda oq-dáriler jarylǵan bolatyn. Keıinirek Qazaqstan Prezıdenti Qasym-Jomart Toqaev Arysqa baryp, jarylystyń zardaptaryn joıý jóninde shuǵyl sharalar qabyldaýdy tapsyrǵan edi.