Polıseıler almatylyqtardy Qazaqstanda tyıym salynǵan ekstremıstik DVK qozǵalysynyń ruqsat etilmegen mıtıńterine qatyspaýǵa shaqyrady, dep habarlaıdy Qamshy.kz aqparat agenttigi Zakon.kz Saıtyna silteme jasap.

"Quqyq qorǵaý qyzmetteri ondaı kúmándi sharalarǵa qatyspaýǵa shaqyrady. Ol sharalarǵa ruqsat berilmegen. Eger kóshege shyqqandardyń arasynda júrmese – qarapaıym halyqtyń qaýiptenetin jóni joq", – dedi Almaty Polısıa Departamentiniń resmı ókili Saltanat Ázirbek.

Mıtıńke qatysý úshin emes, kóshede jáı júrgen qala turǵyndary baıqaýsyzda ustalyp qalǵan jaǵdaıda ne isteý kerek?

"Adamdar qandaı jaǵdaıda ustalady? Zań talaptaryna qaıshy, polısıa qyzmetkerleri júrme, shyqpa degen jerlermen ádeıi ótetinder ustalady. Kezdeısoq adamdar ustalmaıdy. Ustalyp jatqan jaǵdaıda, aty-jóni anyqtalǵannan keıin árbir jaǵdaıda polısıa keshirim surap, bosatady", – dedi Saltanat Ázirbek.