Qurmanǵazy aýdanynyń Azǵyr óńirine gaz qubyry tartylyp, iske qosyldy dep habarlaıdy Qamshy.kz aqparat agenttigi Atyraý oblysynyń Óńirlik komýnıkasıalar qyzmetine silteme jasap. 

Sharaǵa arnaıy qatysqan Atyraý oblysy ákiminiń orynbasary Aıbek Qrambaev saltanatty túrde alaýdy jaǵyp, óńirdiń turǵyndaryn búgingi qýanyshtarymen - Azǵyr óńiriniń kógildir otynmen qamtylýymen quttyqtady.

-Búgingi kún Azǵyr óńiriniń kópten kútken mereıli kúni. QR Tuńǵysh prezıdenti Nursultan Nazarbaevtiń shekara mańyndaǵy aýdandardy damytý jáne sol eldegi halyqtyń turmysyn jaqsartý tapsyrmasy boıynsha joba júzege asýda. Sol kezdegi oblys ákimi bolǵan Baqtyqoja İzmuhametovtiń bastamasymen, qazirgi tańda óńir basshysy Nurlan Noǵaev bul jumystardyń ári qaraı júzege asýyn qolǵa alyp, búginde Azǵyr óńiri tolyq qandy gazben qamtylyp otyr. Kógildir otyn osy óńirdegi halyqtyń turmys-tirshiligine, shaǵyn jáne orta bıznestiń damýyna septigin tıgizetini sózsiz, - deıdi Aıbek Qranbaev.

Azǵyr óńirine gaz qubyryn tartý jumystary 2017 jyly bastaý alyp, qazirgi tańda tolyqtaı aıaqtaldy. Joba NKOK kompanıasynyń demeýshiligimen iske asyryldy.

"Bul aýqymdy joba. Azǵyr óńirine tartylǵan gaz qubyrynyń uzyndyǵy 365 shaqyrym, sondaı-aq, aýylishilik qubyrlar - 68 shaqyrym. Barlyq turǵyndardyń aýlalaryna gaz qubyrlary tartyldy. Ári qaraı ár turǵyn óz úıine tartý úshin qujattaryn rettep, qondyratyn bolady. Azǵyr óńirine kógildir otyn tartylǵasyn, oblys boıynsha gazben qamtý kórsetkishi 98,2 % kórsetip otyr",- deıdi Atyraý oblysy energetıka jáne turǵyn úı komýnaldy sharýashylyq basqarmasynyń basshysy Murat Iǵalıev.