Alakólge demalýǵa barǵan aǵaıynda endi «Úrjar hanshaıymy» men «Altyn adam» qarsy alatyn bolady. Shyǵys Qazaqstan oblysynyń Úrjar aýdany, Qabanbaı aýylynda ashylǵan mýzeı osyǵan múmkindik berip otyr dep jazady Qamshy.kz aqparat agenttigi.  

Eske sala keteıik, Alakól tarıhyndaǵy alǵashqy mýzeı oblys ákimi Danıal Ahmetovtiń tapsyrmasymen «Rýhanı jańǵyrý» baǵdarlamasy aıasynda ashylǵan-dy. Ondaǵy negizgi maqsat – shıpaly kólge demalýǵa kelgen týrıserge elimizdiń, onyń ishinde Shyǵys Qazaqstannyń tarıhı jáne mádenı erekshelikterimen keńinen tanystyrý. Sonymen qatar mýzeıdegi jádigerler arqyly týǵan ólkeniń jaýharlaryn nasıhattap, baǵasyn arttyrý, óskeleń urpaqtyń boıyna patrıotızmdi sińirý. 

Jańadan ashylǵan mýzeıde barlyǵy jeti zal jumys isteıdi. Atap ótsek, «Úrjar hanshaıymy», «Arheologıa» jáne «Shyǵys Qazaqstannyń kıeli jerleri», «Táýelsizdik», «Etnografıa», «Kóshpendiler mádenıeti» men «Palentologıa jáne tabıǵat» atty zaldar bar. Bul zaldardyń bári de taqyrypqa saı jádigerlermen jabdyqtalǵan. Sensorly kıosk, QR-kod sekildi jańa tehnologıanyń keremetteri de kádege jaratylǵan. Jalpy mýzeıde tas dáýirinen tartyp qazirgi zamanǵa deıingi kezeńnen syr shertetin jádigerlerdi kezdestirýge bolady.