Búgin Almaty kóshesine Mustaı Kárimniń esimi berildi dep jazady Qamshy.kz aqparat agenttigi Qazaqstan Respýblıkasynyń Reseı Federasıasyndaǵy elshiliginiń baspasóz qyzmetiniń deregin negizge alyp.  Saltanatty sharaǵa QR Reseı Federasıasyndaǵy tótenshe jáne ókiletti elshisi Imanǵalı Tasmaǵambetov, Almaty qalasynyń ákimi Baqytjan Saǵyntaev, QR Mádenıet jáne sport mınıstri Aqtoty Raıymqulova jáne bashqurt delegasıasyn bastaǵan Mustaı Kárim atyndaǵy qordyń quryltaıshysy, aqynnyń nemeresi Temirbolat Kárim qatysty.

Sonymen qatar, «Mamyr-1» shaǵynaýdanynda ornalasqan kósheniń ashylý saltanatyna qala turǵyndary, qazaqstandyq jáne reseılik aqyn-jazýshylar, etnomádenı birlestikter, jastar uıymdary jáne Mustaı Kárimniń týystary jınaldy.

— Búkil túrik dúnıesiniń uly shaıyry, baýyrlas bashqurt halqynyń aqyny, jazýshy-dramatýrg Mustaı Sáfıuly Kárimniń esimi qalamyzdaǵy eń bir kórnekti kóshege berilip otyr, - dep sóz bastady Almaty ákimi, — Tórtkúl dúnıege esimi keńinen tanymal Mustaı Kárimdi bizdiń qazaq oqyrmany óz aqynym, tól perzentim dep biledi. Aqynnyń «Úsh taǵan», «Taltús» atty kitaptary qazaq tiline aýdarylǵan. Elimizdiń qalyń oqyrmany Mustaı Kárimdi tól aqynyndaı qurmettep, onyń jalyndy jyrlaryn jatqa oqıdy.

Mádenıet mınıstri Aqtoty Raıymqulova aıtqandaı, «sum soǵysty da bastan keshken Mustaı Kárim qolynan aq qaǵaz ben qalamdy bir tastaǵan emes».

— Ol aýyr jaraqat alyp, gospıtáldan saýyǵyp shyqqan soń, maıdannyń alǵy shebine oralyp, óz shyǵarmalary arqyly jaýyngerlerge rýh berip otyrdy. Biz úshin Mustaı Kárim osyndaı izgi de qasterli qasıetterimen este qalady. Onyń umytylmas tylsym týyndylaryn jyr súıer qaýym ǵasyrlar boıy jadynda qalatyny sózsiz, - dedi mınıstr.

Aıta ketelik, Reseıdiń K.S. Stanıslavskıı atyndaǵy Memlekettik syılyǵynyń, Bashqurtstan Memlekettik syılyǵynyń, KSRO Memlekettik syılyǵynyń laýreaty, Sosıalısik Eńbek Eri Mustaı Kárimniń bıyl 100-jyldyǵy keńinen toılanýda.