QR Úkimetiniń Qalýylarymen Qazaqstan Respýblıkasy saýda jáne ıntegrasıa vıse-mınıstrleri bolyp Janel Kýshýkova jáne Azamat Asqaruly taǵaıyndaldy. 

Janel Kýshýkova Petropavl qalasynda týǵan. Qozybaev atyndaǵy Soltústik Qazaqstan memlekettik ýnıversıtetin bitirgen. Eńbek jolyn 2001 jyly Qazaqstan Respýblıkasy Ekonomıka jáne saýda mınıstrligi Dempıńke qarsy baqylaý komıtetiniń ishki naryqty qorǵaý jónindegi jetekshi sarapshysy retinde bastady. 2002-2004 jj. - Qazaqstan Respýblıkasy Indýstrıa jáne saýda mınıstrligi Saýda, halyqaralyq yntymaqtastyq jáne eksporttyq baqylaý departamentiniń Kedendik jáne tarıftik saıasat bóliminiń jetekshi mamany. 

2004-2008 jj. - DSU-ǵa kirý departamentiniń Kedendik-tarıftik retteý bóliminiń bastyǵy, basqarma basshysynyń orynbasary, basqarma basshysy.

2008-2010 jj. - Qazaqstan Respýblıkasy Indýstrıa jáne saýda mınıstrliginiń Syrtqy saýda saıasaty departamentiniń dırektory.

Sońǵy 9 jyl boıy Qazaqstan Respýblıkasy Ulttyq ekonomıka mınıstrliginiń Syrtqy saýda saıasatyn damytý departamentiniń dırektory qyzmetin atqardy. 

Azamat Asqaruly 1984 jyly Almaty oblysynda týǵan. Ál-Farabı atyndaǵy Qazaq ulttyq ýnıversıtetin, Garvard ýnıversıtetin, Gonkong ǵylym jáne tehnologıa ýnıversıtetin bitirgen.

Túrli jyldary «Samuryq Qazyna Invest» JSHS Halyqaralyq qatynastar departamentiniń dırektory qyzmetin atqardy, «KTZ Express Hong Kong Ltd»-ny basqardy, «QTJ Ekspress» AQ áýe kóligi departamentiniń bas mamany boldy. 

2017 jyldan bastap Qazaqstan Respýblıkasy Premer-Mınıstriniń Orynbasarynyń keńesshisi boldy.