Aıtyskerler nege bılikti synaıdy? Sebebi olarmen durys jumys júrgizilmegen. Óńirlerdi aralap júrgen «Nur Otan» partıasy tóraǵasynyń birinshi orynbasary Baýyrjan Baıbek osylaı dedi dep habarlaıdy Qamshy.kz aqparat agenttigi Eýrazıa birinshi arnasyna silteme jasap.
Onyń pikirinshe, qazir aıtystyń deńgeıi tómen. Upaı jınaýǵa tyrysatyndar kóp.
Buryn ózi basqarǵan «Nur Otanǵa» qaıtyp kelgen Baýyrjan Baıbek jumysqa bilek sybana kiristi. Aldymen partıanyń hatshysy Tamara Dúısenovany aýystyrdy. Baspasóz qyzmetinde de kadrlyq ózgeris boldy. 14 oblys pen 3 megapolıstiń arasynan birinshi Batys Qazaqstan oblysyna bardy. Óńirdegi partıanyń jumysy nasharlap ketken. Halyqty tolǵandyrǵan másele kóp. Nurotandyqtar onyń bárine nemquraıly qaraıdy eken.
"Fraksıanyń jumysy kóńilden shyqpaıdy. Ózekti máselelerdi qarastyrmaıdy. Qarapaıym suraqtardan bastaý kerek. Máslıhattaǵy depýtattardyń basym kóbi Nur Otan partıasynyń músheleri. Olar búdjetti, baǵdarlamalardyń oryndalýyn qadaǵalap otyrýy qajet. Ákimder durys jumys istemese ony da bir jaǵyna shyǵarýǵa bolady", -dedi "Nur Otan" partıasy tóraǵasynyń birinshi orynbasary Baýyrjan Baıbek.
Jergilikti atqarýshy bıliktiń jumysyn qadaǵalaýdy kúsheıtemiz deıdi. Sondaı-aq, «Nur Otan» ulttyq óner, aıtysty da qolǵa almaq. Sebebi, rýhanıat salasy da ýystan shyǵyp, aqyndar bet-betimen ketken.
"Eń birinshi qolǵa alǵan isińizdiń biri ulttyq óner, onyń ishinde aıtysty qoldaý boldy. Biraq syrt kúshter osynyózine qoldanyp ketip jatqanynda kórip júrmiz. Aldaǵy aıtys týraly josparyńyzdy bilgim keledi" - dep suraq qoıdy Muhtar Nıazov.
"Kezinde aıtyskerler úlken sahnadan Nur Otan týraly aıtyp, halyqqa ony jaqyn kórsetken bolatyn. Sońǵy saılaýda ózderińiz bilesizder, keıbir aıtyskerler bılikke qarsy shyqty. Nege, olarmen naqty jumys júrgizilmegen. Qazirgi kezde keıbir aıtyskerlerdiń deńgeıi tómen. Jalpy áńgimeni aıtady, halyqqa unaý úshin. Upaı jınaý úshin", - dedi Baýyrjan Baıbek.
Baýyrjan Baıbektiń sózinshe, endi «Nur Otan» burynǵydaı múlgip otyrmaıdy. Áleýmettik jelide belsendilikti arttyryp, el-jurttyń kez-kelgen máselesine reaksıa tanytyp, ýaqyt talabymen birge ózgeremiz deıdi.
