Arystanbek Muhamedıuly jalaqysy týraly resmı málimdeme jasady dep jazady Qamshy.kz aqparat agenttigi. Bul týraly ol óziniń feısbýk paraqshasyna jazdy. 

"Dostarym, jalaqymnyń qansha bolatyny áli ózime de belgisiz bolyp turǵanda, ol týraly jalǵan aqparat tarap ketti. 3 000 000 teńge kólemindegi eńbekaqy - jalǵan. Mundaı shyndyqqa janaspaıtyn aqparat taratý kimge paıda ákeletinin bilmeımin, fake news qoldan jasalǵanyna kúmánim joq. Tym ásire siltepti, basqa ne aıtýǵa bolady.

Ózderińizge aıan, kópten beri mádenıet salasy qyzmetkerlerine joǵary jalaqy berýin suraıtynmyn. Mınıstr qyzmetin atqarǵan bes jyl ishinde osy máseleni birneshe ret kóterdim. Eger osyndaı aqparat shyndyqqa janassa, árıne qýanar edim, ókinishke qaraı, bul ázirge múmkin emes. Ádettegideı sizderge shynymdy aıtaıyn: mınıstr qyzmetin atqarǵanda eńbekaqym 980 000 boldy, 2015 jylǵy 31 jeltoqsandaǵy №1193 «Azamattyq qyzmetshilerge memlekettik búdjet qarajaty esebinen ustalatyn uıymdardyń qyzmetkerlerine, qazynalyq kásiporyndardyń qyzmetkerlerine eńbekaqy tóleý júıesi týraly» QR Ýkimetiniń Qaýlysy negizinde Ulttyq mýzeı dırektory retinde 172 436 teńge eseptelip, qolyma 139 673 teńge beriletin bolady. Bul qyzmettegi meniń sanatym «A1-1», eńbek ótilim mamyr aıyn qosa alǵanda 31 jyl úsh aı boldy.

Sonymen, dostarym, ne shyqty? Naǵyz feık. Jalǵan aqparatta meniń aılyq jalaqym retinde kórsetilgen soma meniń eńbekaqymdy 95 % kóbeıtip, men 12 aıda alatyn 1 676 076 teńgeni eki esege arttyrypty. Bizde «on úshinshi eńbekaqy», bonýstar joq. «Kezdeısoq» mıllıondarǵa qatelesip ketipti...

Mundaı jalǵan aqparatqa sengen adamdar tabylyp, olarǵa túsinik berýim kúlkili jaǵdaı. Osymen bul taqyrypty talqylaýdy doǵaraıyq, aǵaıyn. Mundaı usaq-túıekke ýaqytymdy endi ketirmeımin: aqyldylar ózderi túsinedi, aqmaqtarǵa túsindire almaısyń. Barshańyzǵa jaqsy kóńil-kúı úshin raqmet!", - dep jazdy Arystanbek Muhamedıuly.