Rejıser Turdybek Maıdan men Tilek Tóleýǵazynyń "Muzbalaq" anımasıalyq fılmi 2019 jyldyń 7-14 shilde aralyǵynda Reseıdiń Iaroslav qalasynda ótken «Otbasymen birge» 14 HKF-da Qazylar alqasynyń arnaıy júldesine ıe boldy dep habarlaıdy Qamshy.kz aqparat agenttigi Qazaqfılm saıtyna silteme jasap.

Kartına QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdıasynda túsirilgen.

«Muzbalaq» anımasıalyq fılmi qazaqtyń ǵasyrlar boıy qalyptasqan saıatshylyq mádenıeti jáne adam men búrkit arasyndaǵy dostyq týraly baıandaıdy.

 «Bul bizdiń eńbegimizdiń jemisi. «Muzbalaq» fılmin halyqaralyq qazylar alqasy joǵary baǵalaǵany qýantady. Halyqaralyq anımasıalyq kınofestıvalderdi áli de tańǵaldyratyn bolamyz»,- dedi «Qazaqfılm» AQ anımasıalyq birlestiginiń jetekshisi Adaı Ábildınov.

«Otbasymen birge» kınofestıvali dástúrli túrde otbasylyq jáne balalarǵa arnalǵan úzdik fılmderdi usynady. Kınofestıvaldiń basty maqsaty – otbasy, meıirimdilik, mahabbat, adamgershilikke tárbıeleıtin fılmderdi tanymal etý.  Ár jyl saıyn festıvál uıymdastyrýshylary jańa qalalardy tańdap,  erekshe konkýrstyq jáne oıyn-saýyq baǵdarlamalaryn daıyndaıdy.  Qazylar alqasyna reseılik jáne sheteldik kınoóner maıtalmandary shaqyrylady.

Esterińizge sala keteıik, «Muzbalaq» byltyr QR Kınematografısteri Odaǵynyń «Qulager» júldesinde, «Úzdik anımasıalyq fılm» nomınasıasy boıynsha jeńimpaz atanǵan. Sonymen qatar, XVII «Alaý rýhy» Halyqaralyq kınematografıalyq debútter kınofestıvaliniń balalar jáne jasóspirimder fılmderi konkýrstyq baǵdarlamasyna qatysqan (Hanty-Mansıısk, RF).